Nepal-ah tuilian leh leimin vangin mi 100 thi

Nepal ramah ni hnih chhung ruahsur nasa tak avangin tuilian leh leimin tam tak a thleng a, chhiatna thlenga thi hi nimin thleng khan mi 100 an tling tawh niin official-te chuan an sawi.

An ram khawpui, Kathmandu leh a chheh vel chuan chhiatna nasa hi an tuar a, chin hriat lohin mi eng emaw zat an la awm bawk.

Tuilian tuartute chu in chhanchim tumin an inchungahte an awm a, heng mite hi chhanchhuah hna thawktute chuan lawng hmangin an hruai chhuak a ni. Sorkar thupuangtu, Prithvi Subba Gurung-a'n a tarlan danin, mi 3,000 aia tam chhanchhuah an ni tawh a ni.

State media chuan harsatna tawkte chhanchhuah leh chhawmdawl hna hi police officer 10,000 vel bakah volunteer leh sipaiten an thawk mek tih an tarlang.

Nepal sorkar chuan an ram mipuite chu ṭul leh pawimawh loah chuan zin chhuak lo tura chahin, zan lamah Kathmandu Valley huam chhungah motor khalh a khap bawk. Kawngpui tam zawk, Kathmantu pawhtu te chu hmun tam takah leiminin a hnawh a, thlawhtheihna service pawh a bahhlah phah hle bawk.

Nepal ram hian fur laiin kumtin tuilian leh leimin hi a tuar ṭhin a, sik leh sa inthlak danglam nasat vangin ruahsur pawh a nasa zual niin scientist-te chuan an sawi.