Chile-a tlang kang vangin mi tam tak sawn chhuak

Chile chhim lama Calbuco tlang kang nasa taka a invawrh chhuah leh avangin tlang bulṭhut leh a chhehvela cheng mi sang tel chu hmun him lamah sawnchhuah a ni.

Tlang kang hi Nilaini khan invawrh chhuakin, vut sa leh meikhu nasa tak a chhuak a, China Onemi emergency office chuan warning a tichhuak nghal a ni. He tlang kang awmna hi Puerto Varas khaw bula awm a ni a, Chile khawpui Santiago aṭanga chhim lam km 1,000 vela hla a ni.

Thuneitute chuan tlang kanna bul km 20 bial­a chengte chu insawn­chhuak turin an hriattir a, mi 4,000 vel thiarchhuah an ni tawh bawk.

Chile Interior Minister Rodrigo Pnailillo chuan mipuite chu chiai lo turin a chah a, tlang kanna bula chengte ṭanpui tur leh dan leh thupek kengkawh turin sipaite chu Llangquihue province-ah hian tirh an ni tawh tih a sawi. Vut sa invawrh chhuak chuan eng angin nge tui a tihbawlhhlawh dan hriat­chian a la nih loh avangin tui thianghlim pawh thawn nghal a ni tih a sawi.

Penailillo chuan tlang kang vang hian thi, chin hriat loha bo leh hliam tuar hriat an awm loh thu a sawi bawk.

Chile hi Pacific 'Rim of Fire' a awm a ni a, Indonesia dawta tlang kang tamna ber ram a ni a, an rama tlang awm zing 500-te chu a kang fo a ni. March thla pawh khan chhim lama Villarrica tlang chu a lo kang tawh bawk a, vut leh mei sa te a vawrh chhuak a, mahse a rei lo a ni.