Japan Minister-te'n Yasukuni shrine an tlawh
Japan Prime Minister Shinzo Abe leh China President Xi Jinping-te'n meeting an neih hnu lawkah, Japan cabinet minister pathumte chuan nimin khan Japan ṭhenawm ramte'n an ngaimawh tak, Yasukuni shrine an tlawh.
Yasukuni shrine hi Indopui II-naa Japan sipai thite hriatrengna hmun a ni a, mahse he hmun hi Japan ṭhenawm ramte chuan indo laia Japan sipaite chet dan rawng tak hriatrengna anga ngaiin Japan ram hruaitute'n an tlawh ṭhin hi an ngaimawh thei hle.
Japan cabinet minister-te chuan war shrine an tlawh chhan hi sawiin, "Japan tana bei a, an nunna hlu tak hlantute inpekna chu kan ngaisang a ni," an ti. Nilaini khan Japan lawmaker 100 chuang chuan he hmun hi an lo tlawh tawh a, hei vang hian South Korea foreign ministry chuan a lawm loh thu thuchhuah a lo siam hial a ni.
Japan PM Abe chuan a minister-te chu China President nena inbiakna an neih hma chuan war shrine hi tlawh lo turin a ngen a, nimin khan minute 30 vel an inkawm a, meeting an neih zawh hnu lawk hian minister pahnihte hian shrine hi an tlawh nghal a ni.
Chief Cabinet Secretary Yoshihide Suga chuan minister-te'n war shrine an tlawh hian China nena an inlaichinna kawngah nghawng a nei dawn lo tih a sawi a, mimal thila tlawh an ni, a ti. PM Abe hian a minister-te chu kal lo turin duh mah se, a dang thei ngawt bik lo a ni.
Yasukuni Shrine hi Chiyoda, Tokyo a awm a ni a, he hmunah hian indonaa thite hming 2,466,532 tarlan a ni a, an zingah hian indo laia an mihring puite chunga pawikhawihna lian tak thlentua puh, war criminal 1,068 lai an tel a, heng zinga 14-te chu A-class criminal an ni.