Yemen beihpui thlaknaa kal pilot-te Saudi prince-in car manto a pe dawn
Saudi Arabia kaihhruaiin Arab ram ṭangrualte chuan Yemen sorkar paihthlak tumtu, Houthi hel lakah thlawhtheihna hmangin hun eng emaw chen beihpui an thlak a, Saudi Arabia prince Alwaleed bin Talal chuan beihpui thlaknaa tel, Saudi pilot-te chu Bentley car pek vek a tiam.
Saudi Prince hian beihpui thlaktu pilot 100-te hnenah hian Bentley car thar a pe vek dawn tih a Twitter account-ah a sawilang a ni.
Bin Talal hi kum 60 mi a ni tawh a, Saudi Arabia founder Ibn Saud-a tupa niin, khawvela mi hausa ber zingah a tel pha a ni. Dollar tluklehdingawn 23 hu neia chhut a ni.
Tunhma pawhin bin Talal hian Saudi football team member-te chu Bentley car 25 a lo sem tawh a, kum 2013 khan Forbes magazine-in khawvela mi hausate list a siamah 26-naa a dah avangin a lungawi lo a, magazine hi boycott-ah a vau a ni.
Thla khat dawn beihpui an thlak hnuah, Saudi Arabia hian an thil tumah an hlawhtling thawkhat nia sawiin Thawhlehni khan thlawhtheihna hmanga beihpui an thlak chu tihtawp a ni tih a puang a, inbiakna hmanga Yemen tualchhung buaina chinfel dan kawng a zawng dawn tih a sawi.
Mahse beihpui thlak tihtawp a ni tawh tia sawi a nih hnu hian Nilaini khan helho hmun pawimawhte bomb chhunzawm leh a ni a, Taez khuaah helho leh Yemen sipaite an inbei chhunzawm leh bawk.