EU-in emergency summit a huaihawt

European Union chuan tun hnaiah Mediterranean tuipuia pem tumte phurtu lawng che­sualah mi 800 chuang thihna a thlen hnuah, pem tumte din­hmun ngaihtuahin emergency summit a huaihawt.

Kumin chhungin Africa leh Middle East aṭangin ram danga pem tuma chhuak, tuipuia lawng chetsual vanga thi hi mi 1,750 an tling tawh a ni.

Italy Prime Minister Matteo Renzi chuan mihringa sumdawngte laka action lak a ngaih thu sawiin, "Heng mite hi kum zabi 21-naa sal hmanga sumdawng an ni," a ti

Nimina Brussels-a meet­ing neih hmaa thuchhuah siam­in, EU chuan, "Mihring­­a sumdawngte'n ram danga pem tumte chuanna lawngte chu an hlawkna tura an hman hmaa hriatchhuah tuma beih a ngai a ni," a ti. EU foreign policy hotu, Federica Mogherini chuan hemi atan hian security leh defence policy operation pawh buatsaih ṭan nghal a ṭul tih a sawi.

Thawhṭanni khan EU chuan Mediterranean tuipuia chetsualna thleng fo leh, lawng chetsual vanga thihna tam tak thleng ṭhinte ven dan tur action plan 10 a siam. Heng zingah hian EU Mediterranean rescue service Triton enkawltu, Frontex tana sum tam zawk dahna tur te, Triton operation area tihzauhna turte pawh telh a ni.