Rocket hmangin Israel kah a ni
Ningania Israel-in Independence Day a lawm laiin Gaza Strip aṭangin Palestinian hel nia hriatte'n rocket-in Israel an kap a, mahse hliam tuar leh thiltih chhiat lian tham a awm lo niin Israel thuneitute chuan an sawi. Hei hi thla li zet inbeihna a thlen loh hnua rocket an kah lehna hmasa ber a ni.
Israel chhim lam ramri bula Sderot khua chu rocket hian Ningani tlai khan kah a ni a, mahse rocket hi ram ruakah a tlak avangin pawi a khawih thui vak lo. Rocket hmanga beih an nih hnu hian siren pawh tihrik nghal a ni. Eng pawl mahin rocket kaptu an nih thu hi an la sawi lo a, mahse helpawl tenau zawkte tih nia rin a ni.
Israel chuan tank hmangin rocket-a kahna hi a chhang let nghal a, Palestinian helpawl Hamas-te rorelna, Gaza Strip hmarlama helpawlte hmun pawimawh an kapfuh niin sipai thupuangtu chuan an sawi.
Israel Defence Force chuan Gaza aṭanga beih an nih leh avang hian Gaza-a chengte chu nimina al-Aksa Mosque-a ṭawngṭai turin an kal thei dawn lo tih a sawi.
Gaza ramri bul, Eshkol Regional Council hotu hlui Yesh Atid MK Haim Jelim chuan Israel chhim lama chengte Independence Day vawi 67-na an lawmna niah pawh himna a la awm lo a ni tiin, Israel sorkar chu firfiaka chete chungah na taka action la turin a duh tih a sawi. Hemi rual hian ramri chhehvel bialah chuan boruak muanawm leh him a awm theihna atana inbiakna hmanga remna kawng zawng tura a duh thu a sawi tel bawk.
Kum 2014, December 20 khan Palestinian-te chuan Eshkol biala leilet hmun chu rocket-in an lo kap tawh bawk a, warning siren tihrik niin khawchhunga chengte chu inhumhimna zawngin an tlanchhia a ni. Israel sipaite chuan an ram beihna hi chhang let nghalin, Gaza chhim lama Hamas hmunpui chu an bomb a ni.