Iraq President-in Turkey puihna a dil

Iraq President Fuad Masum chuan Turkey khawpui, Ankara-a Turkey President Recep Tayyip Edrogan nena joint press conference an neihnaah, Islamic State (IS) nen an inbeih meknaah Turkey puihna a dil.

President Fuad Masum chuan IS vanga an ramin harsatna an tawh mek chu an chhehvel bialah hrileng ang maiin a darh thei a ni tiin, firfiakte hmehmih an nih theihna atan Turkey chu sipai bakah a ṭul dang­ahte pui turin a ngen.

Masum chuan Iraq chhehvel biala ram hrang hrangte chuan firfiakte beihletna kawngah mawhphurhna an nei vek a ni, a ti. Turkey thuneitute chuan puih an inhuam tih an lo hrilh nia sawiin, Masum chuan Iraq sipaite training pek leh ralthuam pek belh pawh an inpeih thu an sawi a ni, a ti.

March thla khan Turkey hian Iraq hnenah C-130 thlawhtheihna pa­hnih hmangin silai leh a mu ṭhahnem tham tak chu a lo pe tawh a ni. IS kuta awm mek, Iraq-a khawpui pawimawh, Mosul laklet a nih theihna turin Turkey chuan Iraq a puih tur thu hi a lo sawi tawh a ni.

Erdogan chuan Iraq mipuite mamawh tur chu truck 750 hmangin thawn luh a ni tawh a, a bak pawh thawnluh belh a la nih tur thu a sawi. Hei bakah hian Iraq tual­chhung indona thleng vanga tlanchhia, mi 300,000 vel chu an ramah awmin Iraq rama refugee camp pathum pawh an enkawl mek thu a sawi bawk.