Armenia-in Ottoman Turks kut tuarte hriatrengna hun hmang
Armenia chuan an ram khawpui, Yerevan-ah Ottoman Turks-te'n an mi leh sa maktaduai tel an suatna champha kum 100-naah a hriatrengna hun a hmang.
Mi sang tam takin khawpuiah hian kawng zawhin, thi te hriatrengna pualin pangparte an dah a ni. Hriatrengna inkhawm buatsaihah ramdang hruaitu eng emaw zat an tel a, an zingah hian Russia leh France president-te pawh an tel.
Turkey chuan Armenia-in insuatna thleng ti anga a sawi chu a duh loh thu a sawi a, Indopui I-naah khan Armenia mite bakah Turkey mi pawh mi tam tak an thi a ni, a ti.
Turkey pawhin Indopui I-naa thi te hriatrengna inkhawm hi buatsaihin, Turkey Prime Minster Ahmet Davutoglu chuan Armenia mite tawrhna chu an hriatthiampuiin, an tawrhpui thu a sawi.
Armenian Church chuan insuatna rapthlak tak thlengah hian an mite maktaduai 1.5 vel chu Ottoman Turks kutah an thi niin a sawi a, mahse Turkey chuan thi zat hi an sawi ai hian an tlem daih niin a sawi thung.
Kum 1915 khan an lal ram ṭhendarha awm mek, Ottoman Turks kutah Armenia mite hi an thi a, an zinga tam tak chu civil mi, thlalera hnutchhiah, ei tur leh in tur neih loh vanga thi an ni a, tam tak chu tihhlum an ni bawk.