Germany-in Russia ram hrekah vau

Russia eptu pawl hruaitu, Alexei Navalny tur hmanga  hrai nia sawi chungchangah Germany leh Russia inkar boruak a ṭha lo zel. Russia-in hemi chungchang a chhuina tikhawtlaia Germany a puh hnuah, Germany chuan Russia ram hrekah a vau zui ve nghal. 

Alexei Navalny hi August 20 khan Moscow a pan tur thlawhtheihnaa a chuan laiin dam loin nikhaw hre loin a awm zui a, Siberia hospital-a enkawl a nih hnuah August 22 khan Berlin-ah sawn a ni. 

European Union hotu dinhmun chelh mektu, Germany chuan kar liam ta khan Russia president Vladimir Putin khingpui, eptu pawl hruaitu hi nerve agent Novichok hmanga hrai a nih thu a sawi a ni. Hemi chungchang hi sawifiah turin Russia sorkar pawh a phut nghal a, a sawifiah loh chuan Russia ram hrek dan tur ngaihtuah a ni dawn tih foreign minister Heiko Maas chuan a sawi.

Maas chuan, "He pawikhawihna thleng hi Russia sorkarin a sawifiah a, a chinfel ngei pawh kan beisei.  He thil thlengah hian sorkar hi a inrawlh lo ngei a nih chuan, thu dik tak a sawi a ngai a ni," a ti. 

Britain sorkar pawhin Navalny chu Novichok hmanga hrai ngei tih a chiang a, hemi chungchanga hian Russia chuan zawhna chhan tur pawimawh tak a nei a ni, tiin a lo sawi tawh bawk. 

Hetih lai hian Russia chuan Navalny beih a nihnaah mawh­phurhna a nei lo tih a sawi a, foreign minister Sergei Lavrov chuan Germany chuan an thil hmuh chhuah chungchang pawh engmah a la hriattir ve lo tih a sawi thung. Foreign ministry thupuangtu Maria Zakharova chuan thil awmdan chhui an tumna tibahlahah Germany chu a puh let a ni. Russian prosecutor-ten August 27-a ngenna an thehluh chu tun thlengin Germany thuneitute chuan an la chhang lo a ni, a ti. Russia Parliament pawhin Navalny chu tura hrai a ni tih finfiahna Russian doctor-ten an  hmu lo tih a sawi. 

Kum 44 mi, Navalny hi eptu pawh hruaitu bakah anti-corruption activist a ni. Langsar taka President Putin leh a kaih­hruai sawisel ngamtu a ni a, ṭum eng emaw zat man a lo tawk tawh a ni. Navalny hi Putin-a'n mihring a hlauh ber tia sawi  ṭhin a ni a, a chungchang a sawinaah pawh Putin hian a hming hmerhin a sawi lang ngai lo tih ṭhin a ni.