Trade deal siam nan EU hnenah Oct 15 thleng hun pe

Britain prime minister Boris Johnson chuan European Union hnenah insumdawn tawnna tur, trade deal siam an tum chu Octo­ber 15 hmaa tihfel turin a ti a, hemi hun chhunga an inrem thei lo a nih chuan inbiakna neih chhun­zawmpui a tum tawh lo tih a sawi. 

Kumin January 31 Britain hian EU hi chhuahsan mah se, trade deal thar siam tuma an hmalaknaah hma an la sawn thei lo a ni. Inremna an lo siam tawh sa hi December thla  hian a tawp tawh dawn a ni. 

Johnson chuan inremna siam tur hian October 15 thleng hun siamin, hemi hnu lamah  ngaihtuah chhunzawm chu a tum lo tih a sawi. "Hun tiam chhunga kan inrem thei lo a nih chuan, chu chu a nihdan tur a ni tia kan pawm tlan mai a ngai tawh ang," a ti. EU nen trade deal hi an siam thei ta lo a nihchuan, Britain chuan bloc dang, Australia leh a dangte chu inremna siampui a tum mai dawn a ni, a ti. 

EU leh Britain-in trade deal siam tuma inbiakna an neih hi hun eng emaw chen a chatlak a, mahse tun karah inbiakna hi chhunzawm an tum. France foreign minister Jean-Yves le Drian chuan inremna siam thuai a ṭul thu sawiin, inbiakna an bahlah chhanah Britain a puh. EU chuan inremna siamte chu parliament pawmpuina te a ngaih dawn avangin November thla hmaa tihfel a ngaih thu a sawi ve bawk.