Saudi Arabia-in Palestinian-te tan rorelna dik duh
Saudi Arabia lal, King Salman bin Abdulaziz chuan US president Donald Trump hnenah Arab Peace Initiative, 2002-a tarlan angin, an ram chuan Palestinian-te tana rorelna dik leh an buaina chinfel sak chu a duh a ni tih a hrilh.
United Arab Emirates (UAE) leh Israel-in US hmalakna hnuaia inlaichinna siam a, thawhdun an remtih hnua a ṭum khat nan King Salman leh President Trump-te hi Pathianni hian telephone-in an inbia a ni. UAE hi Arab ram zingah Israel nena inlaichinna siam remti ram pathumna a ni.
King Salman chuan US-in remna leh muanna a awm theihna tura hma a lakna chu ṭha a tih thu a sawi a, hemi rual hian an ram chuan Palestinian mite tan dik tak leh rintlak inremna siam an duh thu a sawi. Arab Peace Initiative, 2002-a siamah chuan Arab ramte chuan Palestinian ram hran din a nih a, 1967 Middle East war laia Israel-in ram a lo luahsak tawhte a chhuahsan vek chuan, Israel chu inzawmna ṭha tak siam pui an rawt a ni.
Islam sakhaw din ṭanna leh an hmun thianghlim tam tak awmna, Saudi Arabia hian Israel ram hi a la pawm ve lo. Mahse UAE leh Israel-in direct flight an siamah ram pahnihte thlawhtheihnate chu a ram boruakah thlawh a phalsak thung.