Israel-in Lebanon a beihnaah Hamas hruaitu a thi

Israel chuan Lebanon-a Hezbollah helpawl lakah beihpui a thlak chhunzawm zel a, Lebanon chhim lam a beihnaah Palestinian firfiakpawl, Hamas hruaitu, Fateh Sherif Abu el-Amin a thi niin nimin khan Hamas chuan an sawi.

Hamas lamin an tarlan danin, Fateh Sherif Abu el-Amin leh a nupui, an fapa leh fanute chu nimin zinga Israel in Tyre khua an awmna, Palestinian refugee camp a beihnaah an thi a ni.

Israel beitu dang, Popular Front for the Liberation of Palestine (PFLP) chuan Israel-in Beirut-a Kol district-a apartment building an kahnaah an pawl, mi lah sa pathum an thi niin an sawi bawk. Hei hi Israel in Beirut khawpui huam chhunga airstrike an neihna hmasa ber a ni.

Israel sipaite chuan Palestinian pawlte thusawi chungchangah thuchhuah engmah an la nei lo a, mahse Israel hmar lam himna turin an ram beitute lakah chuan beihpui an thlak zel tur thu erawh an lo sawi tawh a ni. Beirut khaw dai an beihnaah Hezbollah hotu lu ber, Hassan Nasrallah a thih hnuah Israel hian nimin khan Lebanon hi a la bei chhuznawm reng a ni.

Lebanon-a Israel beihpui thlakna avangin mi 1,000 vel thi tawhin, mi 6,000 chuang an hliam tawh niin Lebanon lam chuan an sawi. Environment minister Nasser yassin cuan mi nuai 2.5 vel chu hmun him lamah an tlanchhe tawh a, mi sang tel chu an chhungte bulah leh khawlaiahte camp siamin an khawsa mek niin a tarlang. Prime minister Najib Mitaki chuan mi tam takin himna zawnga an in leh lo an tlanchhiatsan chu an ram chanchina chhiatna thleng rapthlak ber niin a sawi.

Yemen-a Houthi hmun kap

Israel sipaite chuan Gaza Strip-a Hamas firfiak leh Lebanon-a Hezbollah helpawl nena an inbeih mek karah, Pathianni khan Yemen rama Houthi helpawl hmun an kap bawk.

Houthi helte hian Yemen aṭangin ni hnih chhung chu missile hmangin Israel hi an lo bei ve bawk a, heihi chhang letin Israel chuan a bei let ve a ni. Hemi chungchangah hian Israel sipai chuan thuchhuah siamin, 'Kum eng emaw chhung chu Houthi helte hi Iran kaihruaina leh sum hmanga an puihna hmangin an che ṭhin, Israel bei turin Iraq helte an thawhpui bawk a ni," a ti.