Pakistan-in hna nuai 1.5 leh ministry 6 ti tawp

Leiba ngah avanga sum lama harsatna tawk mek, Pakistan sorkar chuan sum lama an harsatna khaichhuahna tura International Monetary Fund (IMF) inremna a siampui bawhzuiin, sum hman chhuah tih ziaawmna turin ministry hrang hrang hnuaia hna nuai 1.5 a tihtawp bakah, ministry paruk a ti tawp a, ministry pahnih a chhunfin bawk.

IMF chuan Pakistan puihna tur, assistance package pek hi September 26 khan remtiin, Pakistan-in inrenchemna kalpui a tiam hnuah a thawh khatna atan USD tld 1 a pe chhuak a ni.

Finance minister Muhammad Aurangzeb chuan an ram economy siamṭhatna tura programme an duante chu IMF nen an tifel ta tih sawiin, an policy te hi a taka kenkawh ngei a ṭul tih a sawi. G20 an zawm ve theihna turin an economy chu an siamṭhat thuai a ngai a ni, a ti. An ram sum leh pai dinhmun pawhin kawng dik lam a hawi chho mek a, foreign exchange reserve pawhin hma sawnin a san ber ṭum a thleng tih a sawi. An ram thil siam chhuah thawn chhuah lamah hmasawnna chu a ṭul hle tih sawiin, investor-ten an ram economy-a rinna an nghah ngam chu hmasawnna ropui tak a nih thu a tarlang.