Japan PM thar turin inthlanpui neih hun tur a puang

Japan prime minister thar tur, Shigeru Ishba chuan October 27, 2024 ah an ram inthlanpui neih a ni dawn tih a puang.

Liberal Democratic Party (LDP) headquarters, Tokyo-ah nimin khan news conference neiin, Ishiba chuan, mipuiten roreltu thar tur chu a rang thei ang bera an thlan a ngai a ni, a ti.

Ishiba hi kar liam ta khan rorellai, LDP party hruaitu atan thlan a nia, vawiin hian Parliament-ah legislator-ten prime minister atan an thlang ve leh dawn a ni. Prime Minister office la luah lo mah se Ishiba chuan inthlanpui neih hun tur hi a puang nghal a ni.

Nimin vek han Ishiba hian a thawhpui turte pawh a ruat nghal a, a cabinet minister-ah hian party hruaitu inchuhnaa a khingpui pahnihte pawh an tel. Katsunobu Kato chu finance minister atan ruatin, Yoshimasa Hayashi chu chief cabinet secretary a ni chhunzawm ang. Defence chief hlui, Takeshi Iwaya chu foreign minister a ni dawn a, ministry of defence chu kum 2016-a lo enkawl tawhtu, Gen Nakatani-a'n a enkawl dawn a ni. Hetih lai hian kar liamta Zirtawpnia party hruaitu thlan thawh hnihna a hmachhawn pui, Sanae Takaichi erawh cabinet member ah ruat tel a ni lo thung.