Syria rama UN staff 200 chuangin Covid-19 kai
United Nations-a official leh medical worker-te chuan nimin khan Syria-a Covid-19 dona kawnga thawktu UN staff 200 chuangin Covid-19 hri an kai tih an tarlang.
Syria-a U.N. Resident Coordinator and Humanitarian Coordinator Imran Riza chuan UN staff tam tak te chu Syria rama Covid-19 hri leng darh tur venna kawngah an thawk tih sawiin, thawk zinga mi 200 chuangin hri an kai ta a ni, a ti.
Humanitarian worker leh medic lam chuan hei ai hian UN staff hri kai an tam an rin thu an tarlang. Syria-ah hian Covid-19 hri kai hmasa ber chu March 22 khan a ni a, nimin thlengin hri kai tawh zawng zawng hi mi 3,171 an awm. Heng zinga enkawl dawn tawh hi mi 730 an awm a, hri thihpui tawh hi mi 134 an awm tawh bawk.
Australia-in nakkum
January-ah vaccine peih tum
Australia chuan January thlaah chuan Covid-19 vaccine first batch an peih fel hman an rin thu nimin khan an tarlang.
Prime minister Scott Morrison chuan vaccine siam chhuah a nih theih nan CSL Ltd nen an thawh dun thu a sawi a, anni nena ṭangkawp hian AstraZeneca leh Oxford University COVID-19 vaccine chu nakkum January leh February thla hian dose maktaduai 3.8 an neih hman a rin thu a sawi bawk.
May thla hnuah UK-ah
Covid-19 kai pung leh
Covid-19 hri len ṭan tirha Europe rama hri kai tamna hmasa ram United Kingdom-ah chuan hri lengin ziaawm lam a pan tawh hnuah, Pathianni khan hri kai thar mi 2,988 an awm leh.
Pathianni kha May 23 hnua ni khata UK-a hri kai tam ber ni a ni a, sorkarin hri leng vangin inkhuahkirhna hrang hrang a hman te chu zawi zawia thlahdul chhoh a ni a, hei bakah hian test tih tam a nih vangin hri kai thar hi an pung niin media-te chuan an tarlang.
Hri kai hmuhchhuah thar te hi an taksa lama harsatna nei lo an ni. UK-a Covid-19 kai tawh zawng zawng awm zat hi mi 3,47,152 an ni a, thihpui tawh hi mi 41,551 an awm.
Israel-ah hri kai dam
tawhte damdawi-inah thawk turin inpe
Israel khawpui Jerusalem-a Hadassah hospital-ah Covid-19 kaite enkawl turin he hri kai dam tawhte an inpe. Damdawiina thawktute pui tura inpe hi mi 30 vel an awm tawh.
Hadassah hospital hian pilot program kalpui niin, he program hmang hian inpe te hi damdawi-ina thawh tir an ni. Hri kai dam tawhte hian medical lam thil erawh an thawk dawn lo a, Covid-19 hri kai damlo te chu awmpuiin an kawm ṭhin dawn a, an harsatna neihte ngaihthlak sakin, thil an ei ṭhat theihna turin an pui ṭhin bawk ang.
Hri kai hmuh
chhuah tawh mtd 27.3
Khawvel pumah Covid-19 kai hmuh chhuah tawh chu mi 2,73,00,868 an awm tawh a ni.
Hri kai hmuh chhuah tawh zinga mi 1,93,72,831 chu enkawl an ni tawh a, mi 8,93,130 in an thihpui tawh thung. Hri kai mek zingah 99% chu dinhmun ṭha, ngaihtuahawm lo a ni a, hetih lai hian 1%, mi singruk chuang erawh chuan dinhmun ṭha lo an ni thung.
US-ah chuan hri kai hi mtd 64 an chuang tawh a, 1,93,253 in an thihpui tawh bawk. Hri kai tamna leh thihpui tamna ber ram a la ni zui zel a ni. India chuan hri kai tam lamah nimin khan Brazil a pel a, hri kai hmuh chhuah tamna ram pahnihna niin mi 42,04,613 in an kai tawh a ni.
Hun eng emaw chen hri lengin ziaawm lam a pan hnuah, UK leh France-ah pawh hri kai an pung thar leh chak hle.