Belarus-ah President duh lohna lantir chhunzawm zel

Belarus president Alexander Lukashenko bang tura phut leh, inthlan ṭhat buatsaih phutin Pathianni khan an ram khawpui, Minsk-ah mi tam takin kawng an zawh leh. 

Sorkarin nawrh huaihawta kawngzawh khapna thupek a tihchhuah chu ngaih pawimawh loin, mi  nuai khat velin kawng an zawh leh a ni. Minsk bakah an ram chhunga khawpui lian dangah pawh nawrh huaihawt a ni bawk. 

Thla khat dawn chu  President bang tura phutin nawrh huaihawt a lo ni tawh a, nawrh huaihawtnaa police-te nena innawr buainaah mi eng emaw zat an thi tawh a, mi sang chuang man an  ni tawh bawk. 

Pathiannia kawngzawh hi March of Unity tiin an vuah a, kalkhawmte hian flag var leh sente kengin, Lukashenko duh lohna thute an aupui a ni. 

Hetih lai hian President chuan bang tura nawrna chu zawm a tum loh thu a sawi nawn leh a, an rama nawrh huaihawt a nih chungchang khawthlang ramte chu puhin, Nato sipaite chuan Belarus ramriah an inchhek nasa niin a sawi. Tualchhung buaina an tawh mek chungchangah Russia president Vladimir Putin hmu tura zin a tum.