Hong Kong police ten nawrh huaihawt mi 289 man
Hong Kong sorkarin Legislative Council election neih tur a sawn hlat avangin Pathianni khan Hong Kong mi eng emaw zat chu lungawi loin khawlaiah nawrh an huaihawt a, nawrh huaihawt zinga mi 289-te chu police-ten an man.
Ruahman lawknaah chuan Pathianni (September 6) khan Legislative Council election chu neih tum a ni a, mahse Covid-19 hri leng vangin Chief Executive Carrie Lam chuan Emergency Regulations Ordinance hmangin nakkum September 5-ah sawn hlat a nih thu July 31 khan a lo sawi tawh a ni.
Democracy thlawptu lam chuan an dinhmun a ṭhain, inthlan neih turah hian chak ngei an ring. Hei vang hian sorkarin inthlan neih hun a sawn hla hi an duh lo hle a ni. Hei bakah hian Hong Kong national security law thar hman chu an duh loh thu an sawi bawk.
Hong Kong-ah hian national security law thar hman a nih tak avang hian sorkar do zawnga punkhawm leh nawrh huaihawt phal a ni lo a, hei vang hian Hong Kong police-te chuan nawrh huaihawtte hi pepper ball hmangin an hnawt darh a, an zinga ṭhenkhat chu an man zui bawk.
Thuneitute lamain inthlan sawn hlat chhan bera an sawi chu Covid-19 leng mek vang a ni a, Hong Kong-ah hian January 23 khan hri kai hmasa ber hmuh a ni.
Hri kai hi an la pun belh zel a, Pathianni thleng khan hri kai hmuh chhuah tawh mi 4,879 an awm a, heng zinga mi 4,510 chu enkawl dam tawhin he hri thihpui tawh hi mi 94 an awm tawh a ni.