Clinton-in Democratic Party nomination a pawm

Democratic Party-in kumin November thlaa US President thlanna neih tura party candidate atana a nominate-na chu Hillary Clinton-i chuan a pawm a, hmei≠chhe zingah major party presidential candidate ni thei hmasa ber a ni.

Philadephia-a Democratic National Convention neihnaah, Ningani zan kha US Secretary of State hlui, Clinton-i hian thu sawiin, party-in a nominate-na chu a pawm thu a sawi a ni. Clinton-i chuan President atana thlan tlin a nih chuan an party tan chauh ni lo,America mipui zawng zawnga tana President a nih tur thu leh, an ram ṭhalaite tan hna thawh tur tam zawk siam a, hlawh ṭha zawk siam tura a beih hmasak ber tur thu a sawi. President a nih chuan ni 100 chhungin party dangte nen Indopui II hnu lama an rama investment lian ber siam tura an thawh tur thu a sawi bawk.

Clinton-i chuan a khingpui tur, Republican candidate Donald Trump chungchang pawh ṭum 20 chuang zet a sawichhuak a, ram himna chungchanga hrechiang tawk lo leh, ram pawn lama sumdawnna nasa taka kalpuitu a nih thu a sawi.

Ram 100 chuang zet a tlawh tawh a, hei vang hian Trump ai chuan ram kaihhruaina kawngah tawnhriat a nei ṭha hle tih a sawi a, Islamic State firfiak pawl beihlet kawngah te, Russia leh Iran chungchangahte tawnhriat a neih ṭhat zawk thu a sawi. "Kan ram hi eng ang dinhmunah nge a awm tih kan chiang a, mahse kan hlau lo. Kan tih ṭhin ang bawkin kan ramin chona a hmachhawn ang zelin kan bei zel dawn a ni" a ti.

Donald Trump chu an rama hlauhna tuhah a puh a, "Khawvel ram dang lak aṭangin min lakhran a tum a ni" tiin, "Keini chuan indai≠danna bang kan siam dawn lo a, chu ai chuan mi tinin hna ṭha zawk an hmuh theihna turin kan bei zawk dawn a ni" a ti. Democratic lamin an ngaih pawimawh hrang hrangte a sawilang a, chung zingah chuan khawvel sik leh san inthlak danglam chak zel ven dan ngaihtuah te, minimum wage tihsan leh immigration law siamṭhat bakah finance law siamṭhatte a sawilang.