Al-Qaida aṭangin al-Nusra inla hrang

Syria rama hmunpui nei, al-Nusra Front chuan al-Qaida firfiak pawl aṭanga an inlakhran thu a sawi.

Al-Nusra Front hotu hlui, Abu Mohammed al-Jolani chuan he thu hi video an tihchhuahaha puang a, an pawl hming pawh Jabhat Fath al Sham, The Front for liberation of al Sham tia thlak a nih thu a sawi bawk.

Video hi Ningani khan tihchhuah a ni a, Jolani chuan,"Jabhat al-Nusra hminga kan hma lak zawng zawngte tihtawp a ni tih kan puang a, 'Jabhat Fath al-Sham' hming puin kan awm tawh dawn a, he pawl hian pawn lamah zawmpui a nei lo a ni" a ti. UN Security Council chuan an pawl hi a hrek mek a, US leh Russia pawhin firfiak pawlah a chhiar bawk.

US chuan al-Nusra hian al-Qaida nena an inzawmna titawp mah se, an pawl an thlir dan chu a la danglam lo tih a sawi. White House thupuangtu Josh Earnest chuan al-Nusra te hian US leh Europe himna tiderthawng theiah ngaih a la ni reng tih a sawi a, hei vang hian an chetdan chu a danglam vek an ring lo tih a sawi.

Al-Nusra hi kum 2012 kumtir lama Aleppo leh Damascus-a thihchilh bomb tipuaktu nia an inchhal hnuah hriat an hlawh ṭan a, an pawl hian ralthuam an neih ṭhat bakah an fighter-te pawh training ṭha tak pek an ni. Ṭum tam tak Syria ram chhunga pawikhawihna an thlen tawh a, security force-te pawh an bei fo a ni.