Biak-In beituin France a vauna video tichhuak

France rama Catholic Biak-In beitu mi pahnih zinga pakhatin France ram a vauna video chu nimin khan tihchhuah a ni.

Catholic bishop-te chuan an rama pawikhawihna thleng vang hian nimin khan ram pum huapin ṭawngṭai turin an sawm a, hemi ni tak hian vauna video hi Islamic State website-ah tihchhuah a ni.

Video tichhuaktu hi kum 19 mi, Abdel Malik Petitjean a ni a, France ram chuan an ram himna tiderthawng theia a puh, 'Fische S' list-a June thla khan a lo telh tawh a ni. Syria ram a kal tur dangin thawn kir a lo ni tawh a ni.

Petitjean-a video hi Islamic State (IS) linked Amaq news agency-in a tichhuak a, Petitjean hian French leh Arabic ṭawngin thu a sawi a, a chenna ina lak nia hriat a ni. Petitjean chuan France President Francois Hollande leh Prime Minister Manuel Valls-te chu vauin, France ram chu an beih tur thu a sawi.

Biak-In beitu pahnih, Petitjean leh Adel Kermiche-te chu police-ten an kaphlum a, Kermiche hi hriat nghal mai a ni a, mahse Petitjean hi a hriatchhuah mai a ni lo a, a DNA test aṭangin investigator-ten tunge a nih an hre thei chauh a ni. An pahnih hian Normandy khua, Saint-Etienne-du-Rouvray Biak-In an beih dawna video an siamah chuan IS firfiak pawl an thlawpna thu an sawilaite tihlan a ni. Biak-Inah hian zing ṭawngṭai hun hman laiin an lut a, puithiam kum 86 mi Jacques Hamel chu a nghawngah chema zaiin an that a ni. Hamel hi karleh Thawhlehni hian vui a ni ang.