Indonesia-ah thiam loh chantir mi pali kaphlum

Indonesia sorkar chuan ruihhlo tawlhruk thubuaia thiam loh a chantir mi pali-te chu firing squad-ten an kaphlum. Thiam loh chang kahhlumte hi Indonesia mi pakhat leh Nigeria mi pathum an ni.

Mi pali-te hi an tanna, Nusakambangan tan-inah an ram sanaa Ningani zan zanlai pelh hretah an kaphlum a, hetihlai hian thiam loh chang, midang 10-te erawh chu kahhlum an nih hun tikhawtlai sak an ni thung.

Indonesia Deputy Attorney-General Noor Rachmad chuan an thiltih chu thil tihchakawm tak ni lo mah se dan chu kenkawh ngei a ngai tih a sawi. "He thil hi ruihhloa sumdawnna tihtawpna tura halakna a ni a, thiam loh chantir mi dangte pawh hi tihhlum an la ni dawn a ni" a ti.

Hetihlai hian Human Rights pawl Amnesty International chuan mi tang kahhlum an ni chu na takin a sawisel a, international law palzutna a nih thu a sawi.

Indonesia hian drug law khauh tak a nei a, ruihhlo tawlhruk thubuaia thiam loh chantirte chu tihhlum theih an ni. Kum 2015 April thla khan drug convict 14 a lo tihlum tawh a, heng mite hi a tam zawk chu ramdang mi an ni. Australia chuan convict tihhlum zingah an ram mi pahnih an tel avangin lungawi lohna lantirin Indonesia rama an ambassador chu an ko haw a ni.

Ningani zana kahhlumte hi nimin zing khan an chhungte hnenah an ruang hi hlan an ni.