Ruahsurin Nepal-a chhanchhuah hna thawh a tikhaihlak Lirnghing vanga chhiatna thlenga thi 3726 an tling tawh

Kar kalta Inrinnia Nepal rama magnitude 7.9-a naa lir­nghing vanga chhiatna rapthlak tak thlenga thi chu nimin thleng khan mi 3,726 an tling tawh a, hliam tuar mi 6,500 chuang an awm bawk. Hetihlai hian ruah surin chhanchhuah hnathawh a tikhaihlak a, hna an thawk chak thei lo.

Lirnghing tuarte ṭanpui a, chhanchhuah leh chhawmdawl hna thawk turin ram hrang hrangte'n team eng emaw zat an tir lut tawh a, in chima tangte zawn hna chu khawl leh ui fing hmanga thawh chhunzawm mek a ni.

Nepal sorkar chuan lirn­ghing inṭanna, an ram khawpui Kathmandu hmarthlang lam km 80 vela hla, Lamjung chhehvel biala lirnghing tuarte ṭanpuina leh chhanchhuahna hna thawk turin theihtawp chhuah a nih thu a sawi. Lirnghing vanga in chim leh lei chimin kawngpui tam tak a hnawhpin avangin inkalpawhna lamah harsatna a la awm a ni.

Lirnghinna bial tlangdunga thingtlang khuate chu tlawhpawh theih an la nih loh avangin chanchin kimchang hriat theih a la ni lo a, thi zat pawh hi an la punchhoh rin a ni.

Kathmandu district chief administrator Ek Narayan Aryal chuan nimin khan Kathmandu khawpui chhunga hmun 10-ah puan in leh tui thianghlim semchhuah a ni tih a sawi. Aryal chuan Inrinnia magnitude 7.9-a lir a nghin hnuah khan a nghing nawn, aftershock ṭum 100 chuang zet a awm tawh tih a sawi a, hei hian chhanchhuah hna thawhna kawngah pawh harsatna a thlen a ni, a ti.

Kathmandu khawpui chhung­a sorkar leh private dam­dawi-in hrang hrangte a khat vek a, damlo dahna hmun awl a awm tawh loh vangin doctor-te pawhin damdawi-in pawn lamahte an enkawl tawh niin official-te chuan an sawi.

Lirnghing tuarte chhan­chhuah hna thawhnaah hian ramdang mi eng emaw zatin an pui a, India, China, leh US chuan chhanchhuah hna thawktu tur team eng emaw zat an thawn lut tawh a ni.

Ram hrang hrangte'n Nepal ṭanpuina pek an tum thu an puang tawh a, European Union chuan tui thianghlim, damdawi leh emergency shelter atan dollar maktaduai 3.25 pek a tum thu a puang.

Nepal ṭanpui tur hian international medical team 14 leh search-and-rescue team 15 tirh an ni tawh tih UN chuan a sawi a, a ṭul a nih chuan sipai thlawhtheihna pawh hman a ni ang, a ti. United Nations Children's Fund (UNICEF) chuan lirnghing hi Nepal rama naupang nuai 50 velin an tuar a, ṭanpui an ngai tih a sawi.