US-ah Japan PM a zin

Japan Prime Minister Shinzo Abe chu kar khat cham turin nimin khan US a thleng. A cham chhung hian US hruaitute chu US-Japan thawhdunna nghet leh ṭha zawk siam dan tur a sawipui ang.

Japan PM hian US President Barack Obama chu meeting a neihpui dawn a, hei bakah hian Arlington National Cemetery-ah pangpar a dah dawn a, sumdawng leh sorkar mi pawimawhte a kawm bawk ang.

Naktuk, April 29 hian Congress joint session-ah thu a sawi dawn a, Japan PM zingah thu sawi hmasa ber tur a ni.

Abe-a'n US a pan rual hian Indopui II laia Japan sipaite nawmchenna atana Korea hmeichhia an man luih, 'comfort women' zinga pakhat, Yong Soo Lee chuan Washington a pan ve nghal. Lee hi comfort women la dam 52 zinga pakhat a ni a, Japan PM chu Indopui laia Japan sipaite chetdan rawng tak vanga thupha chawi tura a intiamna hlamchhiahah a puh.

Yong chuan, "PM Abe hian dawt a sawi a ni, Indopui laia thil thleng rapthlak tak hi a tak ngei a ni tih lantir turin Abe hmaah hian ka ding duh a ni. Abe hi inphahhnuai taka thupha chawi turin ka duh a ni," a ti. South Korea sorkar chuan nawmchenna atana Korea hmeichhia sang tel man an nih chungchangah hian Japan sorkar chu thupha chawi turin vawi tam tak a lo phut tawh a ni.