Israel-in Syria ramri a bei

Israel sipaite chuan Pathianni khan Syria nena an inri-na bul, Israel kuta awm Golan Heights-ah helho bomb keng lai an hmuh avangin thlawhtheihna hmangin an bei nghal tih an sawi.

Sipaite chuan helho hian bomb chu ramri lam panpuiin, Israel sipaite beih an tum niin an sawi. Israel thlawhtheihna hmangin bomb kengtu helte hi beih an ni a, thi leh hliam an awm leh awm loh erawh sawilan a ni lo.

Syria rama helpawl zing­ah Israel beih tumtu an nih thu hi sawilang an la awm lo. Syria ramah hian kum 2011 aṭang khan tualchhung indona a thleng tawh a, tual­chhung buai­naah hian Israel chuan inrawlh tum lo mah se, nikum September thla khan Golan Heights-a Syrian fighter jet chu Israel sipaite'n an lo kapthla tawh a ni. Golan Heights hi kum 1968 Middle East war-a Israel-in Syria aṭanga a laksak a ni a, indo zawh hnuah pawh a luahzui ta zel a ni.

Israel sipaite hian Syria ram aṭanga mortar hmanga beih an tawh zauh zauh ṭhin thu an sawi a, heng zinga ṭhenkhat chu tihpalh thila Israel lama kah nia an hriat thu an sawi laiin, ṭhenkhat erawh chu Israel sipai leh civil mite beihna atan tum renga kahchhuah a ni, an ti. Ramri-a inkahna thleng ṭhinah Syria chu mawhphurhtuah a puh ṭhin bawk.