Israel-Hezbollah : Israel-in khawmual aṭangin a bei ṭan ta

Israel chuan hun eng emaw chen boruak aṭanga beihpui a thlak hnuah, Thawhṭanni zan, September 30 aṭang khan Lebanon chhim lamah Hezbollah helpawl chu khawmual aṭangin a bei ṭan ta.

Israel Defence Force (IDF) chuan Hezbollah pawl chakna, Lebanon chhim lama helpawl hmunte bei turin tank leh sipaite a tir lut a ni. Hetih lai hian Beirut chhim lam daiah thlawhtheihna hmanga beihpui a thlak pawh a la chhunzawm zel a, he hmun an beih hma hian civil mi chengte chu hmun him lama insaseng turin a hriattir lawk a ni.

IDF thupuangtu, Daniel Hagari chuan Hezbollah chuan ramri bula khuate chu nikum October 7-a Hamas-ten Israel an beih ṭum ang khan, Israel beihna tura inbuatsaihna hmun atana hman an tum niin a sawi. "October 7-a thil thleng khan kan ramri aṭangin engmah kan thlen tir tawh dawn lo," tiin Hezbollah te chuan Israel mi pawisawi lote lakah beihpui a thlak tum hi 'Conquer the Galilee' tia an vuah thu a sawi bawk.

Hezbollah deputy leader, Naim Qassem chuan Israel-in khawmual aṭanga beih a tum a nih pawhin lo chhang let turin an inpeih thu TV-a thu a sawinaah a sawi lang. Lebanon ramri bula Israel sipaite chu an 'target' hmasa tur a nih thu a sawi a ni. Hei hi Israel beihpui thlakna an pawl hotu lu ber, Hassan Nasrallah a thih hnua TV-a thu a sawina hmasa ber a ni.

Mipui ngaihdan lakah Netanyahu dinhmun a sang chho

Israel Channel 12 in an ram mipui ngaihdan a lak thar ber result a tih chhuahah prime minister Benjamin Netanyahu dinhmun a ṭha chho leh a, inthlanpui buatsaih ni se a kaihhruai, Likud party chu seat la tam ber tura ringtu an tam hle.

Hamas firfiakten nikum October 7-a Israel an beih hnuah khan Netanyahu larna hi a tlahniam nasa hle. Mahse tun hnaiah Hezbollah lakah Israel sipaiten beihpui an thlak hnuah a dinhmun hi a rawn sang chho leh a ni.

Mipui ngaihdan lakah Netanyahu dinhmun hi kang chho leh mah se, inthlanpui neihah party mala sorkarna siam thei an awm ring lo an tam ber a, ṭangrual sorkar din a ngaih leh an ring hlawm.

Hetih lai hian Netanyahu kaihhruai ṭangrual sorkar chu Pathianni khan a elpui ber, New Hope party hruaitu Gideon Saar chuan a zawm ve leh a, hei vang hian prime minister a nihna pawh a sawhngheh belh zel a ni. Netanyahu chuan Saar nen chuan an thawkdun zel dawn tih a sawi. Saar hi security cabinet member-ah ruat a ni dawn a, mahse portfolio erawh pek a ni lo ang.

Parliament-a member pali nei, New Hope party in an zawm ve leh tak avangin Netanyahu kaihhruai sorkar hian seat 120 awmna Parliament-ah thlawptu 68 a nei ta a ni.