Mexico President thar Sheinbaum la lut

Mexico President thlanna hnehna changtu, Claudia Sheinbaum chu thlan tlin a nih aṭanga thla li hnu, nimin October 1, 2024 khan President atan rinawmna thu tiam tira lak luh a ni ta. Mexico hian hmeichhe president a neih hmasa ber a ni. Catholic tamna rama Juda chhungkua aṭanga President ni thei hmasa ber a ni bawk.

Kum 62 mi, Mexico City mayor hlui Sheinbaum lak luh inkhawmah hian Brazil president Luiz Inacio Lula da Silva leh US First Lady Jill Biden bakah, ram dang palai eng emaw zatin an tel pui a ni.

Claudia Sheinbaum hi energy engineering-a Ph.D nei a ni. Energy, environment leh sustainable development chungchangah article 100 chuang leh lehkhabu pahnih a ziak. Intergovernmental Panel on Climate Change-ah pawh a tel tawh a, kum 2018 khan BBC in 100 Women a thlan chhuah zingah a tel bawk.

Kum 2000-2006 chhung khan president kal chhuak Andres Manuel Lopez Obrador hnuaiah environment secretary a ni ṭhin. Kum 2015-2017 ah Tlalpan mayor niin, 2018-ah Mexico City mayor atan thlan a ni. Kum 2023 khan kumina President thlannaa chuh tumin Mexico City mayor a nihna aṭang hian a bang a, kumin June thlaa inthlanah khan left-wing National Regeneration Movement (Morena) candidate niin thlan tlin a ni ta a ni.