Russia-in defence budget 25% in ti pung dawn

Ukraine nena indo mek, Russia chuan a defence budget chu 25% in a ti pung dawn a, ṭum khata a pun sanna tur ber a ni ang.

Defence budget tih san a nih dawn tak avangin 2025-a budget-a sum dah tur hi ruble tn 13.5 (USD tld 145) a tling dawn tih Parliament website-a draft budget document-ah tarlan a ni. Hei hi kumina defence budget atana sum dah aiin ruble tn 3 velin a tam a ni.

Kum 2025-a Russia in defence lam tana sum hman tur hi sorkar sum hman zat tura ruahman, ruble tn 41.5 (USD tld 446) aṭangin 32% vel a tling ang. Budget ruangam siamah social spending hi 16% a tih pun a ni bawk.

Draft budget hi Thawhṭanni khan Parliament lower house, Duma ah thehluh a ni a, anni hian a lo ennawn ve leh phawt dawn a ni.

National security tana sum ruahman hi defence nen tih hran niin, kum 2025 atan ruble tn 3.5 ( USD tld 38) ruahman a ni bawk. Defence leh security tana sum ruahman hi ruble tn 17 (USD 183) a tling dawn a, heihi an ram GDP aṭanga 8% a tling pha a ni.

Sorkar chuan hnathawkte hlawh, pension leh subsidy pekna tur, social spending atana ruble tn 6.5 ruahmanin, education tan ruble tn 1.58 leh healthcare atan ruble tn 1.86 a ruahman bawk.