Iran-in missile 200 dawnin Israel a kap: 'Iran hian a thiltih man a hmu ngei ang' - Israel PM

Iran chuan Thawhlehni zan khan Israel chu ballistic missile 180 in a kap a, mahse heng missile a kah chhuah zinga a tam zawk chu Israel aerial defence systems chuan a lo kap thla a ni. Iran missile kahin chhiatna a thlen dan kimchang hi an la sawi lang lo.

Israel prime minister Benjamin Netanyahu chuan Iran-in missile hmanga an ram a bei chu Iran thil tihsual lian tak a ni tiin, "A thiltih man hi a hmu ngei ang," tiin a vau zui a ni.

Iran missile kah chhuahin thil a tih chhiate chu Iserael-in sawi chiang lo mah se, BBC chuan missile hian military base ṭhenkhat a fuh maithei niin a tarlang a, school leh restaurant te pawh a fuh tel nia sawi a ni bawk. Israel sipaite chuan Iran missile an kah thlak loh zinga tlemte chuan an ram laili leh chhim lam hmunṭhenkhat a fuh niin a tarlang. Israel emergency service chuan Tel Aviv area-ah mi pahnihin hliam an tuar tiin a sawi.

Iran Islamic Revolutionary Guard Corps (IRGC) chuan missile kap chhuaktu an nih thu hi sawiin, Israel military base pathumte chu an bitum tih an tarlang. An missile kah chhuah zinga 90% hian an target an fuh niin an sawi ve thung a, Israel beihna atana hypesonic missile an hman hmasak ber niin an sawi bawk.

IRGC chuan Israel-in an commander pakhat leh, Iran thlawp pawl hruaitute a thah avanga Israel an chhan letna niin an sawi. September 27 khan Lebanon khawpui, Beirut-a Israel beihpui thlaknaah Hezbollah pawl hotu Hassan Nasrallah leh IRGC commander Abbas Nilforoshan te an thi a, July thla khan Iran khawpui, Tehran-ah Hamas hotu Ismail Haniyeh thah a ni bawk. Israel chuan Haniyeh thattu an nih thu hi sawi lo mah se, Israel kut tuara thi ngei nia ngaih a ni thung.

US-in Israel a thlawp thu a sawi nghal

Iran-in missile hmanga Israel a beih hnuah, US president Joe Biden chuan Iran chet dan chu na taka demin, US chuan Israel a thlawp tlat dawn tih a sawi.

President Biden chuan Middle East-a US sipai awmte chu Israel defence pui tur leh, Iran missile kah chhuahte chu lo kap thla turin thupek pawh a ti chhuak a ni. Vice president Kamala Harris pawhin President thupek hi a lo thlawp bawk.

Pentagon thupuangtu, US Navy destroyer chuan Iran missile kah chhuah hi eng emaw zat a lo kap thla niin a sawi a, US defence secretary Lloyd Austin pawhin missile eng emaw zat an lo kah thlak thu hi a sawi ve bawk.

UK fighter-te pawhin Thawhlehni zana Iran-in Israel a beihnaah hian Israel chu a lo pui bawk nia sawi a ni. UK prime minister Sir Keir Starmer chuan Israel-in a ram venghim tura hma a laknaah UK chuan a thlawp a ni, a ti. France leh Japan pawhin Iran chet dan chu an dem thu an sawi chhuak nghal bawk a ni.

Israel-in chhan let ngei a tum

Israel prime minister Benjamin Netanyahu chuan missile hmanga an ram a bei chu Iran thiltih sual lian tak a ni tiin, a man an tel ngei tur thu a sawi.

Israel defence force thupuangtu, Daniel Hagari chuan, "Hma lak dan tur ruahmanna kan nei vek tawh, a hun leh hmun kan tihah kan che ang," a ti.

Iran hian tun ṭum hi kumin chhunga direct-a Israel a beih ṭum hnihna a ni. Kumin April thla khan Israel hi a lo bei tawh a, mahse hemi ṭum hian a beih tur thu hi a sawi lawk a ni. Mahse Thawhlehni zana a beih dawn ṭum hi chuan engmah a sawi lawk lo thung.

Israel beih a nih chungchangah a ṭhianṭha, US pawhin Iran a rawn vau zui ve nghal. US national security advisor, Jake Sullivan chuan Iran chetdan hian nghawng pawi tak a nei dawn tih sawiin hemi thlen tir tur hian Israel an puih tur thu a sawi. US chuan Israel chu dinpuiin, Iran a beih letna turah pawh a thlawp dawn a ni, a ti.

Hmun him lamah Khameinei la tawm bo zel

Iran ram hotu lu ber, Ayatollah Ali Khameinei chu missile hmanga Israel an beih hnuah hmun him lamah a la tawm bo zui zel niin Iran official chuan a sawi.

Khameinei hi kar liam taa Israel-in Beirut-a beihpui an thlaknaa Hezbollah helpawl hruaitu, Hassan Nasrallah a thih hnuah khan hmun him lama tawmbo tir a ni a, a la awm chhunzawm zel a ni. Thawhlehni zana Israel beihna tura missile kah chhuah kha a thupeka tih nia sawi a ni a, Israel-in a lo chhan letna tur atan pawh Iran chu a inbuatsaih lawk niin official chuan a sawi bawk.

Iran president Masoud Pezeshkian chuan Israel an beih hnuah an thiltih chu Israel beihna chhan letna a ni tiin,"Netanyahu chuan Iran hian indo a duh lo a, mahse a ram himna tiderthawngtute lakah na takin a do let dawn tih lo hre rawh se," tiin a sawi zui a,Iran chu intihbuaipui lo turin a vau zui bawk a ni.