Israel-in Beirut a beihnaah mi 5 an thi

Israel chuan Lebanon khawpui, Beirut-a Hezbollah pawl hmun nia sawi chu nimin khan an bei a, mi panga an thi a, hliam tuar pasarih an awm bawk niin Lebanon health official te chuan an sawi.

Israel sipaiten an beih hi Bachoura-a Hezbollah hnuaia awm, health centre bulding nia sawi a ni. Lebanon Parliament aṭanga hla lo tea awm a ni. Nilaini zan khan Israel Defence Force (IDF) hian Dahieh khaw chhim lamah ṭum nga air strike an nei bawk.

IDF hian Lebanon chhim lama inbeihnaah an sipai pariat an thi tih an lo sawi tawh. Hei hi Iran thlawp Hezbollah helpawl laka ground operation a neih hnuah an sipaite an channa hmasa ber a ni. Hezbollah chuan Israel tank-te an tih chhiat sak niin an sawi a, Israel sipaite dang let tur hian mi leh sa leh ralthuam pawh an nei ṭha tawk niin an sawi.

Israel sipaite hian hun eng emaw chen boruak aṭanga beihpui a thlak hnuah, Lebanon chhim lam ramri bula Hezbollah hmunhmate ti chhe turin khawmual aṭangin a bei ṭan a, ramriah hian tank-te pawh a tir lut tawh a ni.

Lebanon thuneitute chuan kar hnih chhung Israel-in beihpui a thlaknaah hian mi 1,200 vel an thi tawh a, an in leh lo tlanchhiatsan mi mtd 1.2 vel an awm tawh bawk niin an tarlang.

Israel-in a sawisel hnuah UN hotuin Iran demna thu a sawi

Iran-in Thawhlehni zana missile tam tham hmanga Israel a kah chungchangah United Nations secretary-general, Antonio Guterres chu Iran demna thu a chhahchhuah mai loh avanga Israel-in a sawisel a, an rama luh a khap thu a puang hnuah UN hotu chuan Iran chet dan a dem thu a sawi ve leh.

Thawhlehni zan khan Iran hian missile 180 velin Israel a kap a, hei hi ram hrang hrangten an dem thu an sawi. UN hotu Guterres chuan he thil thlengah hian Middle East-a buaina punlun zel chu a dem thu a sawi ringawt a, Iran sawiselna a sawi tel lo a ni. Hei vang hian Israel pawh a lungawi lo hle a, UN hotu hi an rama a kal an khap zui a ni.

Israel foreign minister Israel Katz chuan Guterres chu Israel dodal a, firfiakte thlawptu a ni, a ti. Israel chunga rawng taka chetu demna thu a sawi duh loh avangin Israel ram leilung rap tlaka an ngaih loh thu a sawi zui bawk.

Hemi hnu hian UN hotu chuan Iran-in missile tam tham tak hmanga Israel a bei chu a dem thu UN Security Council hmaah a sawi a, kumin April thlaa Iran-in Israel a beih pawh a dem tih a sawi nghal bawk. Hemi rual hian Gaza Strip-a Israel sipaite chet dan pawh a sawisel nghal bawk a, secretary general a nih chhunga sipaite beihpui thlakna leh chhiatna thlenna nasa ber a ni, a ti.