Vawiinah Hezbollah hotu Nasrallah vui dawn

Lebanon-a Hezbollah helpawl hotu lu ber, Israel sipaiten an thah tak Hassan Nasrallah chu vawiin hian vui a ni dawn.

September 27, 2024 khan Israel sipaiten Lebanon khawpui, Beirut-a Dahieyh hmuna Hezbollah headquarters-a air strike an neihnaah Nasrallah hi a thi a ni. Israel chuan Hezbollah hotu a thih thu hi a puang hmasa a, a hnuah an pawl pawhin an rawn nemnghet zui ve leh a ni.

Hezbollah hi Iran sorkar thlawp niin, an hmelmate beihna kawngah pawh an hman ṭangkai tak an ni. Hei vang hian Nasrallah thah a nih avang hian Iran-ah pawh lungawi lohna an lantir nasa hle. Iran-in Israel a beih letna chhan pakhat a ni bawk.

Nasarallah a awm tak loh vangin Hezbollah chuan an pawl hotu atan Hathem Safieddine ruat a nih thu an puang. Safieddine hi Nasrallah laichin hnai tak niin, Hezbollah din a nih ṭantir lam aṭanga zawmtu a ni ve bawk. Kum 1990 chho aṭang khan Nasrallah thlaktu atan hian hual a lo ni tawh nia sawi a ni.

US chuan Hezbollah hotu thar, Safieddine hi kum 2017-ah firfiakah a lo puang tawh a, hemi kum vek hian Saudi Arabia pawhin blacklist-ah a telh bawk. Safieddine hi Hezbollah political affairs enkawltu ber ni ṭhiin, an pawlin beihpui an thlakna hrang hrangte buaipuitu, Jihad Council hotu a ni bawk.