Myanmar sipai sorkarin chhiarpui nei ṭan

Myanmar sipai sorkar chuan an ram pumah chhiarpui a nei ṭan ta. Hei hi nakkuma inthlanpui an neih tur atana voter list siamna tur a ni tih a sawi.

Chhiarpui nei tur hian zirtirtute leh administrative worker-te chhawr an ni a, an ram khawpui Napyitaw aṭanga ṭanin, in tinah an kal a ni. Sipai leh police-ten an kalna hmun apiangah an zui ve zel bawk.

Hetih lai civil sorkar aiawhtu atana din, Nationl Unity Government (NUG) chuan sipai sorkarin chhiarpui a neih mekah mipuite chu fimkhur tura chahin, information lo lak puite chu an bei let dawn niin an vau ve bawk. Nikuma survey neih a nih pawh khan mi tam tak chuan beih an tawk a, nunna chan phah pawh an awm nual a ni. Chhiarpui neih hi sipai sorkar dodaltu lam chuan an sawisel a,sipai sorkarin eptu lam ṭangte thlithlai a tumna hmanrua niin an ngai.

Ministry of immigration and population chuan chhiarpui hna thawk tur hian mi 42,000 chuang thawk chhuakin, ram chhunga chhungkaw mtd 13 chuangte chu an tlawh dawn tih a tarlang. Zawhna 68 siamin, hengah hian in khatah mi cheng awm zat, an zir san zawng, eng ang in nge a neih tih leh tui leh electricity an neih dante pawh an zawt tel a ni. Heng bakah hian chhungkaw member zinga hmun danga awm te, an chhungkuaa thi tawhte thihna chhan thlengin an zawt tel. An hna thawh tawh zawng zawng thlenga chipchiar taka zawh an nih vangin, mi tam tak chuan sipaite hian hremna hmanruaa an hman an hlauthawng a ni.