Prashant Kishor-a'n political party thar a din

Poll strategist, Prashan Kishor chuan Nilaini khan political party thar a din, Jan Suraaj Party chu a puang chhuak ta a, kumin November thlaa Bihar assembly seat palia byelection neih turah an chuh dawn tih a sawi nghal bawk.

Kishor chuan party working president hmasa ber atan Manoj Bharti chu a ruat nghal. Bharti hi schedule caste niin Madhubani chhuak a ni a, diplomat hlui niin ram pali ah ambassador hna a lo chelh tawh a ni.

Patna-a Veterinary Ground-a party foundation session buatsaihah, Kishore chuan kum 2025 inthlan lo awm tur nghah nge, 2024 by-election neih tura an dinhmun enchhin an duh tiin pungkhawmte chu a zawt. Bihar aṭangin NDA sorkar chu a zung chawpin nuaibo an tum dawn tih sawiin, inbeihna chu a inṭan ta a, an hawikir mai mai dawn lo tih a sawi. Foundation session an neihah hian union minister hlui Devendra Prasad Yadav, diplomat-turned-politician Pavan K Varma, MP hlui Monazir Hasan leh Sitaram Yadav te pawh an tel.

Kishor chuan, "CM Nitish Kumar-a'n caste survey a buatsaih chuan chhung tinah buaina a thlen nasa hle a. Kan party in thuneihna a chan chuan, in hmun lo ram neih dan hi siamṭha in, state chhunga thlai thar chhuahte tipungin, a neitu dinhmun nihna kan siam dik vek dawn a ni," a ti.

State chhunga zu khapna dan hman mek pawh thuneihna an chan aṭanga darkar reilote chhungin a titawp dawn tih Kishor chuan a sawi bawk. Zu chhiah aṭanga sum an hmuh ṭhin, Rs vbc 20,000 chu Bihar-a zirna siamṭhatna atan hman a nih zawk tur thu a sawi a ni.