Israel-in Beirut chhim lam a bomb leh

Israel chuan Lebanon helpawl, Hezbollah a beihna chu ngawrh takin a chhunzawm zel. Ningani zan khan Beirut chhimlama helpawl hmun nia sawi chu vawi 10 chuang a bomb. Hemi hma lawk hian West Bank-a Hamas firfiakte chu na takin a bei bawk.

Hezbollah thununna bial nia sawi, Beirut chhim lam, Dihiye an beihnaah hian Hezbollah intelligence heaquarters an kap fuh tih Israel sipaite chuan an sawi. Hezbollah hotu, Hassan Nasrallah thlaktu tura ngaih Hashem Safieddine chu an bitum nia sawi a ni. Safieddine hi underground bunker ah a awm a, a dinhmun hi sawichian a la awm lo. Hei bakah hian Beirut airport bula warehouse pawh an kap fuh bawk.

Lebanon public health ministry chuan Israel sipaiten Ningania lei leh boruak aṭanga an beihnaah mi 37 an thi a, hliam 151 an awm niin a sawi.

Israel hian Hezbollah a beihna hi chawlhsan mai a tum lo a, nimin khan ram pahnihte inrina bul, Lebanon chhim lama khaw 30 chuanga chengte chu a rang thei anga hmun him lama insaseng turin a hriattir leh. Israel Defence Force (IDF) chuan mipuite chu rang taka an khua chhuahsan a, Aawali River hmar lam pan turin an hrilh a, Hezbollah mi leh sa bula awm leh, helpawl hmun bula awmte chuan an nunna dinhmun derthawngah an dah tihna a ni, tiin IDF thupuangtu, Avichay Adraee chuan a sawi.

Beirut khawpui an beih hma hian Israel sipaite chuan West Bank hmarlam, Tulkarm chu thlawhtheihna hmangin an bei bawk a, an beihpui thlaknaah hian mi 18 an thi a, an zingah hian Hamas hruaitu Zahi Yaser Abd al-Razeq Oufi a tel niin an sawi. Ningani zana beihpui an thlak hi kum 2000 hnua Israel sipaten West Bank an beihna nasa ber nia sawi a ni.

Israel-in Iran oil leh nuclear hmun a beih hlauhthawnna a lian

Iran-in missile tam tham tak hmanga Israel a kah chu Israel lamin ngawihsan mai a tum lo a, an chhang let ngei dawn tih pawh an sawi. Hetih lai hian Israel-in phuba a laknaah hian Iran oil leh nuclear hmun a beih hlauhthawnna a lian hle a, hei hi a bei a nih chuan indona lian tham tak a chhuah ngei rin a ni.

Israel prime minister hlui, Ehud Barak chuan Israel hian beihna a tawh hi a chhang ngei tur a ni tiin, khawvela eng ram mahin hetianga beihna hi chhang loin an awm a rin loh thu a sawi. Defence minister, foreign minister leh army chief of staff pawh lo ni tawh, Barak chuan Yemen-a Houthi helpawlin missile hmanga Israel an beih chhan letna atana Pathiannia Israel sipaiten Houthi thunun oil facility power plant leh lawng chawlh hmun a beihte chu a rawn sawi lang a, Iran lakah hetiang thil hi an hmuh leh a rin thu a sawi.

US president Joe Biden pawhin Israel-in Iran oil sector a beih mai theih thu hi an sawi ho tawh bawk niin a tarlang a, hei hi thleng ta se US-in beihpui thlaknaah hian a puih dawn leh dawn loh erawh a sawilang lo. Hemi rual hian Iran nuclear hmun beih chuan buaina lian zawk a hrin chhuah dawn vangin a duh loh thu pawh a sawi bawk.

Khamenei-a'n mosque-a ṭawngṭaina kaihruai

Iran ram hotu lu ber, Ayatollah Ali Khamenei chuan nimin khan Imam Khameinei Grand Mosalla mosque-a ṭawngṭaina hun hi a kaihruai.

Khameinei hian kum nga hnuah Zirtawpnia ṭawngṭai inkhawm a kaihhruai leh thu a sawi lehna hmasa ber a ni a, hei bakah Iran-in missile tam tham tak hmanga Israel a beih hnua mipui hmaa a inlanna hmasa ber a ni bawk.

Mosque-a ṭawngṭai inkhawm zawh hian Israel sipaiten an thah tak, Iran thlawp Hezbollah helpawl hruaitu, Hassan Nasrallah hriatrengna leh zahna lantirna hun hman a ni bawk.

Khamenei hian Zirtawpni ṭawngṭai a kaihhruai hnuhnun ber chu kum 2020, January kha niin, hei pawh hi Iran-in missile hmanga Iraq-a US army base an kah hnuah a ni.