NKorea-in nuclear hmanga beihah SKorea a vau

North Korea ram hotu, Kim Jong-un chuan an ṭhenawm, South Korea chuan an bei a nih chuan nuclear hmanga bei a, tihchhiat vekah a vau.

South Korea president, Yoon Suk Yeol-a'n Armed Forces Day an hmanaah thu a sawiah, Kim hian nuclear ralthuam a hmang a nih chuan NKorea sorkar chu a tluchhia ang tia a vaukhanna a chhannaah Kim chuan he thu hi a sawi tih nimin khan an ram media chuan a tarlang. Korea ram pahnihte hi ṭawngkam na tak takin an invau fo a ni.

Kim hian Nilaini khan special operation forces unit a tlawh a, hemi ṭum hian SKorea sipaite an ram china an lut a nih chuan, an ram venghim turin an ralthuam neihte an hmang vek dawn a, nuclear ralthuam thlengin an hmang dawn tiin a sawi. "Hetiang thil hi a thleng a nih chuan Seoul leh Republic of Korea chu a awm tawh lo ang," a ti.

South Korea sipaite chuan nimin khan NKorea lam hian bawlhhlawh dahna balloon te chu an rama an thlawh luh tir leh tih an sawi. Kumin May thla aṭang khan NKorea hian bawhhlawh a dahna balloon te chu South Korea lamah hian an thawn lut fo a ni.