Imran Khan thlawptute leh Pakistan police te intibuai

Pakistan prime minister hlui, jail-a tang mek Imran Khan thlawptute chuan Inrinni liam ta, October 5,2024 khan an ram khawpui, Islamabad bulah kawng an zawh a, police-te nen innawr buaiin police 80 chuangin hliam an tuar.

Imran Khan chhuah zalen tura phutna kawngzawh hi Paksitan hmarthlang lam, Kbyber-Pakhtunkhwa province-a Khan-a party, Pakistan Tehreek-e-Insaf (PTI) hruaitu in a ho a, Islamabad panin an kal a ni.

Pakistan police-te hian Islamabad khaw daiah hian khawpui an lut tur dang tura awm, police-te chu beiin tear gas te an hmang a, silai pawh an hmetpuak niin Pakistan interior minister Moshin Naqvi chuan a sawi.

Naqvi chuan PTI mi leh sa, kawngzawhte hi ralthuam te an ken laiin, police-te hi buaina nasa zawk a chhuah lohna turin silaite keng lo tura hriattir an ni thung niin a sawi. Buaina a chhuah hnu hian Islamabad-ah venhimna tikhauh zualin, sipai pawh dah luh belh an ni.

Kawngzawhte hian an ram khawpui laili, Parliament leh foreign embassy awmna hmun pan an tum a ni. Mahse Islamabad khawpui an luh hma hian sorkar lam chuan nawrh huaihawt leh punkhawm khapna hi a ti chhuak thung.

Pakistan hian tun hnaiah top-level diplomat event eng emaw zat a thleng dawn a, hei vang hian PTI pawh nawrh an huaihawt tum hi ṭhulh rih tura an ngen thu Naqvi chuan a sawi. October 15-16 a hanghai Cooperation Organisation (SCO) meeting neih tur pawh Khan-a thlawptute hian tihbuai an tum tih report pawh an dawng niin a tarlang.