ASEAN Summit : Myanmar leh South China Sea chungchang sawi ho

Southeast Asian ram hruaitute chu nimin khan Laos khawpui, Vientiane-ah Association of Southeast Asian Nations (ASEAN) summit neiin Myanmar tualchhung indona thleng mek bakah, South China Sea buaina chungchangte an sawi ho.

ASEAN summit-ah hian Middle East buaina pawh an sawiho rin a ni bawk. Member ram 10 - Indonesia, Thailand, Singapore, Philippines, Vietnam, Malaysia, Myanmar, Cambodia, Brunei leh Laos chuan an thawhpui ram dang, dialogue partner-te pawh economy, climate change leh energy chungchangah inbiakna an neihpui dawn bawk. Inbiakna an neihpui tur zingah hian Japan, South Korea, India leh Australia pawh an tel.

Kumin summit-ah hian Myanmar chuan foreign ministry permanent secretary Aung Kyaw Moe a tir a, kum thum chhunga summit-a high level official a tirhna hmasa ber a ni. Kum 2021 khan tualchhung buaina avangin ASEAN chuan Myanmar hi an summit-ah political representative a tirh a khapsak a ni.

Loa prime minister Sonexay Siphandone chuan member ram hruaitute lo lawmin, an bloc-a ram rethei ber zinga mi, Laos chuan a kaihhruaina hnuaiah member ramte thawhhona ṭha leh harsatna an neihte paltlangna kawngah theihtawp a chhuahpui dawn tih a sawi. "Kan inpui tawnin kan thawk ho zel a ni. ASAN ram leh dialogue partner-te thawhhona chak zawk pawh siam zel kan tum a ni," a ti.

Summit zawhah hian chhimtu, ram dang hruaitute chu meeting an neihpui dawn a, an zingah hian China, US leh Russia pawh an tel. Meeting-ah hian US aiawhin secretary of state Antony Blinken leh China aiawhin premier Li Qiang te an tel ang.