2024 Nobel Prize in Physics dawngtu tur puang

British-Canadian scientist, 'Godfather of AI' tia an sawi bawk Geoffrey Hinton leh, American professor John J. Hopfield te chu 2024 Nobel Prize in Physics dawng tura thlan an ni.

Royal Swedish Academy of Sciences chuan chawimawina dawng turte hi puangin, artificial intelligence field-a an hma lakna hmasa leh hnathawhte avangin thlan a ni. Kum 1970 leh 80 chhoa an hnathawh chuan modern AI system dinna tur lungphum an lo din a ni. John J.Hopfield hi Princetion University, US-ah professor niin Geoffrey Hinton hi University of Toronto, Canada-ah professor a ni mek bawk.

Khawvela physicist-te tana chawimawina ngaihhlut ber nia ngaih, Nobel Prize in Physics hi kum 1901 aṭang khan pek chhuah ṭan a ni a, nikum khan Pierre Agostini, Ferenc Krausz leh Anne L'Huillier hnenah hlan a ni. Chawimawina dawng tura thlan hi mi pakhat aia tam an nih chuan, chawimawina in a ken tel Swedish crowns mtd 11 (USD mtd 1.1) chu an insem ṭhin a ni.