Brazil-in X a hrekna a hlip ta

Brazil Supreme Court chuan an rama social media platform, X hrekna chu hlih a ni ta tih a puang.

Justice Alexandre de Moreas chuan Elon Musk-a company, X hian reais mtd 28 (USD mtd 5.1) a chawi hnuah an ramah hman theih phalsak a ni leh ta tih a sawi a, hemi rual hian thu dik tawk lo thehdarhtute account pawh block sak a ni bawk a ni, a ti.

Moreas hian 2022 Brazil President thlanna neih chungchangah sorkarin X hmanga thu dik lo thehdarh ṭhin nia sawi account-te chu a block sak duh loh vangin an ramah hman theih lohin a hrek zui a ni. Court thupek an zawm loh vang hian Musk chuan August thla tawp khan Brazil-a an company staff chu banin, X office pawh a khar zui bawk. Musk chuan judge Moraes-a'n account tam tak tihtawp sak tura a ti chu a thuneihna hmansualna leh, zalen taka mitin thu sawi tura dikna an neih palzutsakna niin a sawi.

Mahse inbiakna an neih leh hnuah leh, X hian court thu anga kal remtiin sum tam tham a chawi bawk a, company hrekna hi hlih a ni ta a ni. X hian Brazil-ah hian representative ruat a remti bawk. X hrekna hlih a nih tak avangin Brazil rama a hmangtu, mi mtd 20 chuangte chuan an hmang chhunzawm leh thei dawn a, hengte hi enzui turin Brazil telecom watchdog, Anatel chu hriattir an ni bawk.