Joe Biden-a'n defence secretary atan General Austin a ruat

US President-elect Joe Biden chuan kum 67 mi, retired General Llyoud Austin chu a defence secretary atan a thlang a, Senate-in a pawm chuan African-American zingah dinhmun luah thei hmasa ber a ni ang. 

Gen Austin hi President hlui, Barack Obama hunlai khan US Central Command hotu a lo ni tawh a ni. Defence secretary atana ruat a nih chungchangah hian Biden leh Gen Austin-te hian thuchhuah la siam loh mah se, US media hrang hrang chuan an tarlang tawh a ni. 

Biden hi a cabinet member tur ruat chungchanga minority tam zawk dah tura nawrna a nasa hle nia sawi a ni a, hei vang hian defence secretary thar atana rin kai ber, under-secretary of defence hlui Michele Flounroy aiah four-star army general hlui, Gen Austin hi a thlang ta zawk nia sawi a ni. 

Gen Autsin hi West Point-a US  Military Acamedy aṭanga graduate in, kum 41 zet army-ah hian a awm a  ni. 

Kum 2003 March thla khan 3rd Infranty Division-ah assistant division commander niin, kum 2005 thleng kha Afghanistan-ah Combined Joint Task Force 180 a kaihruai a ni. Kum 2010-ah Iraq-a US forces commanding general atan ruat a ni a, kum hnih hnuah Middle East leh Afghanistan-a Pentagion operation neih zawng zawngah hotu atan dah niin, Central Command-ah comman­der-ah ruat a ni. 

Kum 2012-ah army vice chief of staff niin, mihang zinga he dinhmun thleng thei hmasa ber a lo ni tawh bawk. 

Kum 2016-ah chawlin, Pen­tagon-a contractor lian ber zinga mi, Raytheon Technologies board of directors-ah a tel. 

Pentagon hotu atan hian military officer-te chu army an chawlhsan aṭanga kum sarih hnuah ruat theih chauh a ni. Mahse Gen Austin hi a chawlh aṭangin kum sarih a la tlin loh avangin Senate-in aṭangin special approval a neih a ngai ang. 

Defence secretary hlui, General Jim Mattis pawh kha ngaihhnathiam a lo ni tawh bawk a ni. 

Gen Austin ruatna hi pawm a nih chuan, US sipai maktaduai 1.2 te hotu lu ber a ni dawn a, sipai zinga 16% hi mihang an ni.