Hurricane Milton vangin mi mtd 2 chuangin power supply nei lo

Hurricane Milton chuan US-a Florida state chu an ram huna Nilaini khan a nuai a, chenna in tam tak a chhia a, mi maktaduai hnih chuang power supply nei loin an awm bawk. Thlipui tlehin chhiatna a thlena thi zat hi hriatchian a la ni lo.

Khawchin zirtute chuan ruah nasa takin a sur zui thei nia sawiin, hei hian tuilian baw hawk pawh thlenin, chhiatna nasa zawk pawh a la thlen thei niin an sawi. Florida hian kar hnih liam ta mai khan thlipui na tak, hurricane Helene an lo tuar tawh a, chenna in tam tak chhiain mi 2256 an thi a ni.

Hurricane Milton tleh hma hian a kalkawng tura cheng, mi maktaduai hnih vel chu hmun him lama insawnchhuak tura hriattir lawk an ni. US president Joe Biden chuan hurricane Milton kum za chuang chhunga Florida rama thlipui tleh na ber leh chhiatna thlen nasa ber tur nia rin a nih thu pawh a lo sawi tawh bawk.

Florida a thlen hian hurricane Milton hi category 3 hurricane niin, 195 kph-a na in a tleh a ni. Nimin zing lamah chuan caterogy 1 hurricane-ah tla thlain, a tleh nat zawng pawh 90mph a ni tawh niin National Hurricane Center chuan a sawi.

Florida khawthlang lam tuipui kama awm, St Petersburg-ah chuan thlipui tleh vang hian tui supply a tawp a, Major League Baseball stadium chung chu thli hian a la bawk a ni. St Petersburg-ah hian ruah inches 16-a tamin a sur zui bawk.