"Kan chet hunah Iran in eng nge thleng a hrethiam lo ang" - Gallant

Israel defence minister Yaov Gallant chuan Nilainia Israel Defence Force (IDF) unit 9900 a tlawh ṭumin, Iran-in missile hmanga Israel a beihna an chhan let dan tur sawiin, 'Kan chet hunah chuan Iran hian eng nge thleng leh, engtin tak nge a thlen tih a hrethiam lo ang," a ti. Iran a chhan letna tur chu rapthlak leh mak tih khawp a ni dawn tiin a sawi.

Gallant chuan Iran-in an ram a beihnaah khan IAF lamin engmah an tuar lo a, runway te pawh dan pangngaiin an hawng veka, thlawhtheihna tih chhiat a awm lo a, sipai leh civil mi zingah thi an awm lo bawk niin a tarlang.

Iran chhang let tur hian Israel security system pumpui, sipai lumum aṭanga prime minister thlengin an inlungrual vek niin Gallant chuan a sawi bawk.

Israel security cabinet chuan Iran-in ballistic missile hmanga an ram a beihna chhan let dan tur chungchangah nimin khan vote lak an tum nia sawi a ni.

Lebanon-a beihpui an thlak mek chungchang pawh Minister Gallant chuan sawiin, Hezollah ho hmun an kah chhiat sak chhunzawm zel avang leh, an pawl hotu ber Hassan Nasrallah thah a nih tawh avangin Hezbollah chu an talbuai tawh hle niin a sawi. Kaihruaitu mumal nei loin, beih letna tur pawh an nei ṭha tawh lo a, Hezbollah pawl chu an tlachhe mek a ni, a ti.

Biden leh Netanhyahu ten inbiak pawh reng an remti

Iran-in missile 200 dawn hmanga a beihna chu Israel hian a la chhang lo a,mahse a chhan let ngei tur thu a sawi avangin, eng angin nge a chhan let dawn tih chu khawvelin a ngaihven reng a ni. Hetih lai hian Israel prime minister Benjamin Netanyahu leh US president Joe Biden-te chuan inbiakpawh zel an remtih.

Ram pahnih hruaitute hi Nilani khan telephone in an inbia a, US Pesident chuan Israel PM hnenah Lebanon-a beihpui an thlak meknaah civil mite tawrhna tlem thei ang ber tura che turin a ngen bawk.

Biden leh Netanyahu hi thla hnih dawn hnua an inbiak lehna hmasa ber a ni. He inbiaknaah hian Iran beihna chhan let a nih dan tur chungchang sawi chhuak kher lo mah se, Biden chuan Iran chet dan chu a dem thu leh, Israel an thlawp tlat thu a sawi leh a ni. Hruaitu pahnihte hian hun lo kal turah pawh inbiakpawh reng an remti a, mimala an inbe lo anih pawhin national security team kaltlanga inbiak zel an tum tih White House thuchhuah chuan a tarlang. Nilainia an inbiaknaah hian US vice president leh Democratic presidential nominee, Kamala Harris pawhin a lo zawm ve a ni.