China-in ram mipui inthlak danglam dan zirchianna nei dawn

China National Bureau of Statistics chuan nimin aṭang khan rampumah an ram mipuite dinhmun inthlak dante zirchianna a nei dawn a, hemi hmang hian economic leh social policy ṭha zawk duan chhoh a tum.

Survey hi November 1 - 30 chhungin neih a ni dawn, agency hi inah kalin data an lakhawm dawn a, online hmang pawhin zawhna hi chhan theih a ni bawk ang. Bureau hian kum 2023 khan zirchianna hi a lo nei tawh bawk a ni.

China rama nau piang thar an tlem leh, kum upa lam pung chak zel chu thuneitute tan thil buaipuiawm tak a ni tawh a ni. Kum 2035-ah chuan kum 60 leh a chunglam hi an ram mipui 40% vel, mi maktaduai 400 chuang an tling tawh dawn niin an chhut. Hei hi Britain leh US-a mipuite belhkhawm zat an tling pha.

Health official-te chuan innei leh fa nei an pun chhoh theihna tur chu an thlurbing deuh dawn tih an sawi. Nu leh pate pawh an fate nupui/pasal nei a, fa neia chhungkua din tura kawhhmuh turin an chah bawk a ni.

Kumin kum chanve-a China rama innei awm zat chu kum 2013 hnua a tlem ber ṭum a tling. An ram ṭhalai zinga tam tak chuan nupui/pasal neih an duh lo tih sawiin, fa enkawlna a hautak em avangin fa neih duh lo pawh an tam hle bawk.