Nobel Peace Prize 2024 dawng tur Nihon Hidankyo

Khawvel chawimawina ngaihhlut, Nobel Peace Prize 2024 dawng turin Japanese organisation, Nihon Hidankyo chu thlan a ni tih nimin, October 11, 2023 khan Norwegian Nobel Committee chuan a puang. He pawl hi Hiroshima leh Nagasaki khawpui bomb tuartute kum 1956-a an din a ni a, khawvel aṭanga nuclear ralthuam tih bo a nih theihna tura beitu a ni.

Nobel Peace Prize dawng tur thlangtu, Norwegian Nobel Committee chuan Nihon Hidankyo chuan khawvela nuclear ralthuam tih bo a nih theihna tura a beih thu leh, a taka tuartute hnen aṭang ngeia nuclear ralthuam hi engtikah mah hman ni tawh lo se an duh zia an aupui thu sawiin, an hmalakna avang hian he chawimawina sang hi dawng tura thlan an ni tih a sawi.

Japan Confederation of A- and H-Bomb Sufferers Organizations, Nihon Hidankyo tia sawi hian Japan prefecture 47-ah member organisation a nei vek a, Japan rama pawl lian leh huhang ngah ber zingah a tel. An thil tum chu nuclear indona chhuak tur ven leh, khawvel aṭanga nuclear ralthuam tih bo a, nuclear ralthuam siam tura ram hrang hrangte inremna an siam ṭhinte tihtawp te a ni. He an hmalakna atan hian international conference pawh an ko ṭhin.

Atom bomb hmanga Hiroshima leh Nagasaki khawpui bomb a nihna chu kum 80 dawn liam tawh mah se, tun thlengin khawvel pumah nuclear ralthuam chu siam chhunzawm zel a la ni a, khawvel himna dinhmun tiderthawngtu ber pawh a la ni reng a ni.

Nobel Peace Prize hian nuclear ralthuam a bo thei tih a lantir ang -Mimaki

Nihon Hidankyo hotu, Toshiyuki Mimaki chuan nimin khan Aug. 6, 1945-a atomic bomb an thlakna, Hiroshima khuaah press conference neiin, Nobel Peace Prize dawng tura an pawl thlan a ni chu mak an tiin an lawm takzet tih a sawi. Hemi rual hian Nobel Peace Prize hian nuclear ralthuam a ti bo thei tih a lantir dawn a ni, a ti.

Hetiang chawimawina dawn hi a rilruah pawh a lo suangtuah pha ngai lo tih Mimaki chuan a sawi. Mahse he chawimawina hlu tak hi nuclear ralthuam tih tawp vek a nih theihan tura an nawrna kawnga an tha tichaktu pawimawh tak a ni dawn tih a tarlang.

December 10, 2024-ah 2024 Nobel Peace Prize hlanna hun hi Oslo, Norway ah hman a ni ang.

Han Kang hnenah Nobel Literature Prize

South Korean author, Han Kang chu 2024 Nobel Prize in Literature dawng tura thlan a ni. Han hi South Korean zingah he chawimawina dawng hmasa ber tur a ni.

Kum 53 mi, fiction writer hian kum 2016 khan a novel, The Vegetarian hmangin Man Booker International Prize a lo dawng tawh bawk. He lehkhabu hi kum 2006-a a tih chhuah niin, 2015-ah Deborah Smith chuan English-a letin an ti chhuak leh a ni. Hei bakah hian The White Book, Human Acts leh Greek Lessons te a ziak tawh bawk.

Nobel Prize in Literature hi lehkhabu pakhat vang ni loin, an hnathawh pumpui aṭangin an thlir a, hei vang hian lehkhabu thlan chhuah pawh a awm ngai hran lo. Chawimawina dawngtu tur thlangtu, Swedish Academy chuan Kang poetic leh experimental style hi a fak hle a, contemporary prose-a innovator ropui a ni, a ti.