Israel tank-in Lebanon-a UN base kap fuh tel

Israel Defence Force (IDF) in Lebanon chhim lama Hezbollah pawl hmun an beihnaah, Ningani khan UN peace keeping mission hmunpui an kap fuh tel a, UN muanna sipai pahnihin hliam an tuar.

Israel chuan he thil thleng chungchang hi sawifiah nghalin, Hezbollah helte hi UN post bulah an chetla ṭhin a, hel an kahna lakah UN base hi a fuh tel niin an sawi. Kar hmasa lam khan Israel chuan UN peacekeeping mission hnenah an hmun hi sawn turin an lo ngen tawh a, mahse UN lam hian an zawm duh lo a ni.

Lebanon chhim lamah hian United Nations Interim Force, UNFIL chuan muanna sipai hi 10,000 vel a dah mek. Kumin September 23-a IDF leh Hezbollah te inbeihnaa a hluar chhoh hnuah khan inkahhai puang turin an lo nawr reng a ni.

UN mission chuan an sipai pahnihin hliam an tuar thu hi sawiin, an ngaihtuahawm lo tih a sawi. Indonesia mi ve ve an ni tih an tarlang bawk.

Israel beihna vanga UN muanna sipai pahnihin hliam an tuar leh, an base kah tel a ni chu ram hrang hrangin an dem nasa hle. UN-a Indonesia ambassador Hari Prabowo chuan Israel chu international law chunga awmah a inngai a ni tiin, Italy defence minister Guido Crosetto pawhin Israel chet dan chu tihsual palh a ni lo a ti a, insawifiah tura a phut thu a sawi bawk.

US chuan UN hmun beih tel a nih chungchang chu a ngaihven zui reng tiin, Israel-in Hezbollah hmunte tih chhiat tuma beihpui a thlak chu a hrethiam a, hemi rual hian UN muanna sipaite himna tiderthawng zawnga chet erawh ṭha lo a tih thu a sawi.