Nepal-China in Mt Everest san zawng puang

Nepal  leh China chuan nimin khan khawvela tlang sang ber, Mount Everest san zawng an puang a, meter 8,848.86-a sang a ni tih an sawi. 

A hmaa khawvelin Mount Everest san zawnga a pawm chu metre 8,848 a ni a, hei hi kum 1954-a Survey of India-in a teh a ni. Mahse kum 2015-a lir nghing na takin Nepal a nuai avang khan Everest tlang san zawng pawh hi a danglam rin a ni a, hei vang hian teh ṭhat a ni ta a ni. An teh ṭhat hnuah a san zawng an puan thar hi a hmaa lo pawm sa aiin cm 86 in a sang ta zawk a ni. 

Kum 2019-a China president Xi Jinping-a'n Nepal a tlawh ṭum khan, ram pahnihten thawk duna Everest tlang san zawng teh ṭhat hi relin, thawhdunna tur inremna pawh an ziak nghal a ni. 

Nepal official leh expert-te chuan tlang san zawng hi teh ṭhain, China-in a lo pui bawk. Kum khat zet data-te an buapui hnuah nimin khan an puang ta a ni.