Japan-SKorea Thawhdunna ṭha neih a pawimawh: Yoshihide Suga

Japan prime minister thar Yoshihide Suga chuan  South Korea nena thawhdunna thar ṭha tak an neih a pawimawh thu sawi. 

Yoshihide chuan South Korea president Moon Jae-in nena telephone-a an inbiaknaah he thu hi sawiin, ram pahnihten tuna harsatna an tawh mek sutkianna atan te, North Korea inluling tur lakah leh thil dang vang pawhin thawhdunna ṭha an neih a pawimawh thu a sawi a ni. US pawh inlaichinna ṭha tak an neihpui a ṭul thu a sawi bawk. 

Indopui II -na hunlai Japan leh SKorea inkar boruak ṭha lo te, kum 1910-1945 inkara Japan company-ten Korea mite tihluihna hmanga an chhawr chungchang te sawichhuah leh fo niin, heng thil avang leh insumdawnna thil avangin ram pahnihte inkar boruak hi a ṭha hlei thei lo a ni. 

Mahse Japan PM thar chuan SKorea President Moon hnenah an inkar boruak ṭha lo awmte chu chinfel a hun tawh niin a sawi a ni. President Moon pawhin inzawmna ṭha zawk siam a nih theihna tura inbiakna nei turin an inhawng reng tih sawiin kar liam ta khan Suga hi lehkha pawh a lo thawn tawh a ni.