US-in Iran petroleum sector hrekna thar a siam

Unites States chuan October 1, 2024-a Iran-in missile ṭhahnem tak hmanga Israel a beihna chhan letna atan, Iran petroleum leh petrochemical sector ah hrekna thar a siam.

US hian Iran petroleum sector nena inzawmna nei company 16 hrekna siamin, lawnglian 23 te a block bawk. Secretary of state Antony Blinken chuan Iran-in a nuclear programme kalpuina tur leh, firfiaka che ṭhinte puihna tura a sum a hmuhna dansak turin US chuan hma a la tih a sawi.

Thuchhuah a siamah Blinken chuan," Iran-in October 1-a Israel a beih hnuah khan,US chuan Iran hi a thiltih man hi tuartir ngei a tum tih pawh chiang takin a lo sawi tawh a ni. Hemi atan hian thil ṭha lo tihna a sum hmuhna, Middle East puma buaina a punlun phahnate chu dan chah turin he ruahmanna hi kan siam a ni," a ti.

October 1 khan Iran hian ballistic missile 200 dawnin Israel hi a kap a ni. Mahse Israel chuan heng missile zinga a tam zawk hi an lo kap thla niin a sawi. Israel prime minister Benjamin Netanyahu chuan Iran-in missile hmanga Israel a bei chu a tihsual lian tak a ni tiin, an thiltih man hi an la hmu ngei dawn tih a sawi.

Israel hian Iran beihna hi an chhang let ngei dawn tih sawi tawh mah se, eng angin chhan let a tum dan erawh a sawi lo a, tun thlengin phuba lakna hi a la kalpui lo bawk a ni. Mahse an beih tur, target hi an duang mek niin report ṭhenkhat chuan an tarlang.

Hetih lai hian Iran chuan Israel-in a bei a nih chuan a bei let dawn tih a lo sawi ve bawk. Hei vang hian US chuan Iran-in a beih leh palh thuah, Israel ram venhimna atan advanced anti-ballistic missile defence system, America sipaiten an enkawl chu thawn a tum nia sawi a ni. Hebrai media lamin an tarlan danin, US hian Israel-in ballistic missile hmanga beihna laka lo indanna tura puihna turin, Terminal High Altitude Area Defense (THAAD) air defense batteries a thawn dawn nia sawi a ni. US president Joe Biden kaihhruai sorkar chuan hemi chungchang hi a ngaihtuah mek a, thutlukna erawh a la siam lo nia report pawh a awm bawk.

Israel-in na zawkin Gaza hmarlam a bei

Israel prime minister Benjamin Netanyahu-a'n Hamas hoin Israel an beih ṭum an mi man, tun thlenga an la hrente chhuahtir an nih theihna turin Hamas te chu hrek rilṭam rawtna ṭha a tih thu a sawi hnuah, Israel sipaite chuan Gaza Strip hmarlam chu na zawkin an bei thar leh.

Israel Defence Force (IDF) ten Gaza hmarlam, Jabalya area-ah Hamas firfiakte leh an hmunhma a awm thu an hriat hnu leh, heng hmuna hian Hamas hoin intuaithar leh an tum tih an hriat hnuah kar liam ta khan beihpui an thlak leh a ni.

Hmalakna thar atana Hamas hrek rilṭam rawtna hi general hlui, Giora Eiland-a'n Israel cabinet-ah a thlen a, mahse cabinet hian thutlukna a la siam lo. Eiland rawtna siamah hian Gaza hmarlam civil mite an kir phalsak tawh loh leh, civil mi la awmte lak chhuak vek a, Hamas firfiakte hrek a rawt a ni.

Lebanon chhim lama mite in lama kir lo turin hriattir

Israel sipaite chuan Lebanon chhim lamah Hezbollah helpawl an beih chhunzawm zel avangin, inbeihna a thlen hnua hmun danga insawnchhuak, civil mite chu an in lama kir rih lo turin a hriattir.

IDF thupuangtu, Avichay Adraee chuan X-ah tarlangin, "IDF chuan in khua leh in khaw bula Hezbollah hmunte chu a bei chhunzawm zel dawn. In himna turin hriattirna dang tih chhuah a nih hma chuan in in lamah kir rih lo turin kan ngen cheu. Chhim lama hian kal rih lo ula, a kal lui chuan in nunna in thap tihna a ni ang," tiin a sawi.

Adraee hian Lebanon chhim lama health worker leh medical team-te pawh ambulance-te hmang lo turin a chah a, Hezbollah te chuan inphenna atan ambulance te hi an hmang ṭhin a ni, a ti. Hezbollah member-te chu bepawp lo tur leh, thawhpui lo turin health worker-te chu a ngen.