US President candidate-te inbei tawk hle

US President thlanna, November 5-a neih tura mipui ngaihdan lakah Democratic party candidate Kamala Harris leh Republican party candidate Donald Trump te an inbei tawk hle

Wall Street Journal chuan Zirtawpni liam ta khan battleground state tia sawi, state pasariha mipui ngaihdan a lak thar a ti chhuak. Harris hian Arizona, Georgia leh Michigan-ah 2% in hma a hruai a, Trump hian Nevada-ah 6% leh Pennsylvania-ah 1% in hma hruaiin, North Carolina leh Wisconsin-ah an intluk tawk bawk.

Reuters/Ipsos poll-ah pawh candidate pahnihte hi an inthlau lo hle a, Harris hian 46% hmuin, Trump hian 43% a hmu bawk.

Hnehna chang turin swing state-te vote hi a pawimawh dawn hle. WSJ poll-ah hian swing state pasarih-ah hian Ukraine-Russia indona thleng mek buaipui fel thei zawk turah mi 50% in Trump an ring a, Harris hian 39% chauh a hmu thung. Israel-Hamas war chingfel thei tur zawka an rinah pawh Trump hian 48% hmuin Harris hian 33% a hmu. Voter tam zawkin economy leh immigration chungchangah Trump an thlawp a; mahse housing leh healthcare lamah Harris chuan a thawh ṭhat zawk ringtu an tam zawk ve thung.