Russia tan-inah Ukraine journalist a thi

Ukraine journalist, kum 27 mi Viktoriia Roschchyna chu August, 2023 aṭanga a chin hriat loha a awm hnuin Russia tan-in ah a thi tih hriat a ni.

Viktoriia pa chuan kar liam ta khan Russia defence ministry aṭangin lehkha a dawng a, a fanu September 19 khan a thi tih an rawn hriattir tih a sawi a, a thihna chhan pawh an sawi lang lo. Ministry chuan a ruang hi Russia leh Ukraine-in tang an inthleng hunah thawn haw a ni dawn tih chauh a tarlang a ni.

Nikum August thla aṭang khan Viktoriia hi a chin hriat lohin a awm a, thla kaw hnuah Russia chuan an ramah a tan mek thu an sawi a, an manna chhan erawh an sawilang lo.

Viktoriaa hi freelance a ni a, Russia-in Ukraine a do hnuah Russia ram lak chin huam chhunga Ukraine mi chengte dinhmun, harsatna an tawh dante a report ṭhin a, a hmunah ngei a kalchilh ṭhin a ni. A hma pawhin man niin ni 10 chhung hren a lo ni tawh a, mahse chhuah a nih hnuah pawh a nunna atan pawh a hlauhawm viau chungin he hna hi a thawh- chhunzawm leh tho a ni. Russia hian khawi hmun nge an man tih leh, eng hunah nge an man tih pawh an sawichiang lo a ni.