Johnson & Johnson-in Covid-19 vaccine zirchiang
US-a Medical device company, Johnson & Johnson chuan Nilaini aṭang khan Covid-19 vaccine zirchianna a nei ṭan a, he vaccine dose khat hian Covid-19 hri hi a hneh thei reng dawn em tih a zirchiang.
He zirchianna hi US, South Africa, Argentina, Brazil, Chile, Colombia, Mexico leh Peru-a volunteer 60,000 teah neih a ni dawn.
National Institutes of Health-a director Dr Francis Collins chuan Covid-19 vaccine zirchiannaah hian mihring tan a hlauhawm thei em tih chu uluk taka an enchian mek thu a sawi a, vaccine hi mihring tan a him tawk em tih hriat chian hma loh chuan hman a nih dawn loh thu a sawi bawk.
Johnson & Johnson-in vaccine final stage zirchianna an neih chungchangah US president Donald Trump chuan US Food and Drug Administration (FDA) chu hma la chak turin a hriattir nghal a ni.
FDA Commissioner Stephen Hahn, Fauci leh official dangte chuan vaccine chungchangah hian thuchhuah siamin, FDA chuan kumin kum tawp lamah emergency atan vaccine hi health worker-te tan hman phalsak pawh nise, nakkum lamah lo chuan America mipuite chuan an hmang thei lo ang, an ti.